काठमाण्डौ, 18 जुलाई 2020
परराष्ट्रमन्त्री प्रदीपकुमार ज्ञवालीले पार्टीभित्र देखिएको आन्तरिक विवादलाई लिएर देशका केही शक्तिले नेकपा विभाजन हुने भो भन्ने भ्रम फैलाइएकाले हल्लाको पछि नलाग्न आग्रह गर्नुभएको छ। नेकपाको आन्तरिक विवाद छलफल र वार्ताबाटै समाधान हुने दाबी गर्दै जनताले दिएको जिम्मेवारीबाट कोही पनि पछाडि हट्न नमिल्ने र पार्टीभित्र देखिएको समस्यालाई छलफलबाट समाधान गरी पार्टी एक ढिक्का भएर जाने उहाँले बताउनुभयो।
हिमालयन एअरलाइन्सले गुल्मी जिल्लाको लागि प्रदान गरेको ‘पीसीआर’ मेसिन हस्तान्तरण कार्यक्रममा शनिबार उहाँले पार्टी जोगाउनका लागि कोहीपनि जिम्मेवारी बोधबाट पन्छिएर दायाँ–बायाँ लाग्न नमिल्ने बताउनुभयो ।
परराष्ट्रमन्त्री ज्ञवालीले पार्टीमा उत्पन्न विवाद प्रतिलक्षित गर्दै भाँडाहरु एक ठाउँमा राखेपछि कहिले–काहीँ बज्ने बताउनुभयो ।
उहाँले नेकपाको एकता मुलुकको संविधान, लोकतान्त्रिक प्रणाली, राष्ट्रिय एकता र राष्ट्रियताको लडाइँजस्ता धेरै कुरासँग जोडिएको स्पष्ट पार्नुभयो ।
अर्को प्रसङ्गमा परराष्ट्रमन्त्रीले भारतद्वारा मिचिएको नेपाली भूमिलाई फिर्ता ल्याएरै छाड्ने दाबी गर्नुभयो। भारतले एकतर्फी रुपमा नेपालको भूमिलाई समेटेर नयाँ नक्सा जारी गरेको र कूटनीतिक तबरबाट सीमा विवादलाई हल गर्न पहल गर्दासमेत भारतले गम्भीरताका साथ नलिएको उहाँले बताउनुभयो।
