हिमाचल, 5 अगस्त 2020
हिमाचल प्रदेशको कुल्लु मनालीमा कामका सिलसिलामा ज्यान गुमाएका एक नेपालीको परिवारलाई 3 लाख 80 हजार राहत रकम प्रदान गरिएको छ । कर्णाली प्रदेशको जुम्ला जिल्लाको तातोपानी गाँउपालिका वडा नम्बर 1 का स्थायी बासिन्दा रोशन सिंहको 2076 असोज 20 गतेका दिन कुल्लु तहशील मनालीको गधेनी गाँउमा घर पलास्टर गर्दा खसेर मृत्यु भएको हो । उनलाई मूल प्रवाह अखिल भारत नेपाली एकता समाज कुल्लु मनाली समितिको पहलमा तहशील मनाली एसडीएम कार्यालयबाट 3 लाख 80 हजार राहत रकम उपलब्ध गराइएको हो । जानकारीका अनुसार 18 वर्षीय मृतक रोशन सिंहका 2 वटा छोराछोरी र एउटी श्रीमति छन । मूल प्रवाहले एसडीएमबाट प्राप्त राहत रकम उनका 2 जना छोराछोरी, श्रीमति र मृतकका बुवालाई बराबर वितरण गरिदिएको छ । त्यस अनुसार मृतककी श्रीमति बदुरी सिंहलाई 95 हजार, छोरा पुर्वा सिंहलाई 95 हजार, छोरी अएमी सिंहलाई 95 हजार र मृतकका बुवा हरिश सिंहलाई 95 हजार प्रदान गरिएको छ ।
