हरियाणा, 8 अगस्त 2020
भारतको हरियाणा राज्यको अम्बालामा अलपत्र परेर विगत 5 वर्षदेखि बाल आश्रममा रहँदै आएका एक नेपाली बालक घरको ठेगाना थाहा हुन नपाउँदा घर फर्कन पाएका छैनन ।5 वर्षअघि अम्बालामा अलपत्र अवस्थामा भेटिएका दाङ स्थायी घर बताउने करिब 16 वर्षका शिवम रोका मगर अहिले अम्बालाकै एक बाल आश्रममा रहिरहेका छन । उनलाई परिवारको अधिकांश सदस्यको नाम थाहा भएपनि घरको पुरा ठेगाना थाहा नभएकाले उनको परिवारलाई खोज्न समस्या भएको छ । बालकले दिएको जानकारीका अनुसार दाङको तुलसीपुर घर बताउने शिवमले बुवाको नाम लक्ष्मण रोका मगर, दाजुको नाम शंकर रोका मगर, दिदीको नाम मिना र गिता रोका मगर बताएका छन ।
लामो समयसम्म परिवारको खोजीको प्रयास गरेको बाल आश्रमले अहिले परिवारको खोजीका लागि दिल्लीस्थित आफन्त नेपाल (किन नेपाल) लाई आग्रह गरेको छ। तर आफन्त नेपालले गरेको प्रयासमा पनि बालकको परिवारलाई खोज्न असहज भएपछि तस्वीरमा देखाइएका बालक र उनको परिवारको विवरणका आधारमा उनलाई चिन्नुहुनेले काठमाडौंमा आफन्त नेपालको नम्बर 015542539 मा र भारतमा +91-9716293602 मोबाईल नम्बरमा सम्पर्क गरेर जानकारी दिन सक्नुहुनेछ ।
