जयपुर, 24 सेप्टेम्बर
भारतको राजस्थान राज्यको जयपुरमा एक नेपाली युवतीलाई प्रेम गरेको सजाय मृत्युको रुपमा मिलेको छ। जयपुरको वरूण पथ मानसरोवर थाना क्षेत्रमा रहने बागलुङ जिल्लाको ताराखोला गाऊँपालिका (साविक तारा गाविस, वार्ड नं ५ घर भएका अमर बहादुर विक (थापा) की छोरी मिना थापालाई उनकै प्रेमि रहेका भारतीय युवक दिपक शर्माले हत्या गरेको परिवारले आरोप लगाएको छ । अहिले दिपक शर्मा पुलिस हिरासतमा छन तर उनले मृतक मिना थापाले आत्महत्या गरेको बताइरहेका छन ।
मृतक मिना थापा र जयपुरकै दिपक शर्मा पछिल्लो 4 वर्षदेखि प्रेम सम्बन्धमा रहेका थिए । स्नाकोत्तर अध्ययन पुरा गरेकी मिना र दिपकले एउटै कम्पनीका लागि मार्केटिङको काम गर्दथे । प्रेमलाई विवाहमा परिणत गर्न भन्दै मिनाले दवाब दिएपछि घटनाको करिब एक हप्ता अगाडी दिपक मिनाको घरमा आएर उनको बुवा अमर बहादुर थापासँग विवाहको कुरा पनि गरेको बुझिएको छ । तर मिनाका बुवा अमरले भने तिम्रो हाम्रो समाज फरक भएकाले पछि कोर्ट म्यारिज र मन्दिरमा विवाह गराउन सक्ने बताएका थिए । र दिपक घर फर्किएका थिए । यस क्रममा मिनालाई दिपक शर्मा पहिलेनै विवाहित रहेको पनि थाहा हुन आएको बुझिएको छ ।
त्यसको ठ्याक्कै एक हप्तापछि अर्थात 20 सेप्टेम्बरका दिन घरबाट लाईब्रेरी जान्छु भन्दै घरबाट निस्केकी मिना थापाको हत्या भएको परिवारले आरोप लगाएको छ । उनको हत्या गर्ने अरु कोही नभएर सोही दिपक शर्मा रहेको परिवारको भनाई छ । दिपक शर्माले भने पुलिसलाई मिनाले आत्महत्या गरेको बयान दिएका छन ।
अर्कोतर्फ घटनाको निश्पक्ष छानविन गरि दोषीलाई कडा कारवाहीको माग गरिरहेको श्रीपशुपतिनाथ वेलफेयर सेवा समितिका संस्थापक नविन बहादुर अछामीले मिना थापाले आत्महत्या गरेको जानकारी दिपक शर्माले दिएको र घरबाट निस्किएकी मिनाले दिपकको घरमा गएर आत्महत्या गर्नु शंकास्पद भएको भन्दै कडा कारवाहीको माग गर्नु भएको छ ।
पुलिसले अभियुक्त दिपकलाई हिरासतमा लिएर अनुसन्धान शुरु गरेको छ । शवको पोस्टमार्टम भइसकेपछि धेरै कुरा स्पष्ट हुने पुलिसले जनाएको छ ।
