काठमाण्डौ, 16 डिसेम्बर 2020
संवैधानिक परिषद्को कोरम नपुगेपछि बस्न नसकेको बैठक सरकारले ल्याएको अध्यादेशपछि अध्यक्षसहित 3 जना सदस्यको उपस्थितिमा भने बस्न शुरु भएको छ । विभिन्न आयोगका पदाधिकारीको नियुक्ति सिफारिसका लागि मंगलबार साँझ सामान्य छलफल भएको संवैधानिक परिषद्को बैठक आज फेरि बस्न लागेको छ । आजको बैठकमा आयोगका पदाधिकारीको नियुक्ति सिफारिसलाई अन्तिम रुप दिन लागिएको बालुवाटार स्रोतले जनाएको छ ।
मंगलवार बिहान बसेको बैठकमा सदस्य संख्या नपुगेपछि प्रधानमन्त्री केपी शर्मा ओलीले तत्काल मन्त्रिपरिषद् बैठक बोलाई संवैधानिक परिषद्सम्बन्धी अध्यादेश राष्ट्रपति समक्ष सिफारिस गर्नुभएको थियो । भने राष्ट्रपति विद्यादेवी भण्डारीले त्यसलाई तत्काल जारी गर्नुभएको थियो ।
उक्त अध्यादेशले संवैधानिक परिषद्को बैठकमा अध्यक्षसहित ३ जना उपस्थित भएमा बैठक बस्न पाउने प्रावधान पारित गरेको छ । त्यसै अनुसार साँझ प्रधानमन्त्री ओलीसहित प्रधानन्यायाधीश चोलेन्द्र शमशेर जबरा र राष्ट्रिय सभा अध्यक्ष गणेशप्रसाद तिमिल्सिना बैठकमा उपस्थित रहनु भएको थियो ।
यसअघि संवैधानिक परिषद् बैठकमा अध्यक्ष (प्रधानमन्त्री)सहित ५ जना उपस्थित हुनपर्ने कानुनी प्रावधान रहेको थियो । सरकारले हठान रुपमा अध्यादेश ल्याएको भन्दै व्यापक आलोचना भइरहेको छ । अध्यादेशको सत्तारुढ दल नेकपासहित प्रतिपक्ष दलका नेताहरुले विरोध गरिरहेका छन ।
लामो समयदेखि संवैधानिक परिषद् बैठक बस्न नसकेका कारण धेरै संवैधानिक आयोगहरुमा पदपूर्ति हुन सकेको छैन ।
