नयाँ दिल्ली, 4 फेब्रुअरी 2021
शहरी विकास राज्यमन्त्री रामवीर मानन्धरले आफुले कायम गरेको विश्व कीर्तिमानले सांगितीक क्षेत्रमा नौलो आयाम थपेको बताउनु भएको छ । बहालवाला मन्त्रीको रुपमा निरन्तर 4 घण्टा 5 मिनेट 20 सेकेन्ड गीत गाएर विश्व कीर्तिमान कायम गर्नु भएका शहरी विकास राज्यमन्त्री रामवीर मानन्धरले दिल्लीस्थित नेपाली राजदूतावासमा न्यूज एजेन्सी नेपाललाई छोटो प्रतिक्रिया दिँदै कोभिड-महामारीका कारण लण्डन जान सक्ने अवस्था नरहेकाले दिल्लीबाट अवार्ड ग्रहण गर्ने कार्यक्रम राखिएको बताउनु भयो ।
उहाँले अवार्ड पाइसकेपछि संगीत क्षेत्रमा लागेकाहरुले यसको महत्व बुझ्ने बताउनुभयो । सांगितीक क्षेत्रमा रोयल्टीको कुरा उठाउँदै आउनु भएका राज्यमन्त्री मानन्धरले यो सांगितीक क्षेत्रसँग जोडिएको रोयल्टीको अवार्ड भएको बताउनु भयो । उहाँले गीत संगीतमा लागेकाहरुलाई रोयल्टी आउने हो भने उनिहरुले अरु काम गर्न नपर्ने बताउनु भयो ।
बहालवाला मन्त्रीको रुपमा लगातार चार घण्टा पाँच मिनेट २० सेकेण्ड गीत गाएर विश्व कीर्तिमान कायम गर्नु भएका शहरी विकास राज्यमन्त्री रामवीर मानन्धरलाई नयाँ दिल्लीमा कीर्तिमान कायम गरेको प्रमाणपत्र प्रदान गरिएको छ ।
नयाँ दिल्लीमा आयोजित कार्यक्रममा भारतका सामाजिक न्याय तथा अधिकारिकता राज्यमन्त्री रामदास आठवलेले गत मंगलबार राज्यमन्त्री मानन्धरलाई उक्त प्रमाणपत्र हस्तान्तरण गर्नु भएको हो।
मन्त्री मानन्धरले गत पुस १० गते सो अवधिमा विश्व रेकर्ड कायम गर्न चार घण्टा पाँच मिनेट २० सेकेण्ड गीत गाउनु भएको थियो ।
