काठमाण्डौ, 24 अगस्त 2021
नेकपा एमालेले अलग्गै पार्टी दर्ता गर्न लागेका माधव नेपालसहितका नेता, कार्यकर्तालाई मूल घरमै फर्कन आह्वान गरेको छ । पार्टी एकताको पक्षमा उभिएका नेताहरुसहित मंगलबार बसेको पार्टी स्थायी समिति बैठकले विशेष प्रस्ताव पारित गर्दै अलग्गै पार्टी दर्ताका लागि क्रियाशील भएका नेता, कार्यकर्ताहरुलाई पार्टीको मूल घरमै फर्कन आह्वान गरेको हो । छुट्टै दल दर्ता प्रक्रियाबाट अलग भई पार्टी एकताको पक्षमा योगदान गर्ने कमरेडहरुलाई पार्टीका हार्दिक स्वागत गरिने र उनीहरुमाथि कुनै पनि प्रकारणको भेवभाव वा पूर्वाग्रह नराखिने प्रस्ताव पनि स्थायी समिति बैठकले पारित गरेको प्रवक्ता प्रदीप ज्ञवालीले जानकारी दिनु भयो । उहाँले भन्नु भयो, ‘पार्टी एकतामा आवद्ध हुनुहोस्, आफनो मूल घरमा फर्कनुहोस् । विभाजनकारी गतिविधि र छुट्टै दल दर्ता प्रक्रियाबाट अगल भएर पार्टी एकतामा योगदान गर्ने कमरेडहरुलाई पार्टीमा हार्दिक स्वागत गरिनेछ । यस अघिको कुनै पनि क्रियाकलापलाई लिएर पूर्वाग्रह नराख्ने र भेदभाव वा कारबाही नगरिने पनि स्पष्ट पार्न चाहन्छौं । बैठकले १० बूदे सहमतिको कार्यान्वयन गर्ने निर्णय पनि गरेको छ । त्यसका लागि पार्टीको केन्द्रिय कमिटीमा रहेर क्रियाशील हुने केन्द्रिय कमिटी, केन्द्रिय निकाय, प्रदेश समन्वय कमिटी र जिल्ला कमिटीलगायत सबै तहका पार्टी कमिटी र जनसंगठनका सबै तहका पदाधिकारी र सदस्यहरुलाई २०७५ साल जेठ २ गते पूर्वको जिम्मेवारीमा फर्कन निर्देशन समेत दिएको छ । प्रवक्ता ज्ञवालीले १० बूँदे प्रस्तावमा आधारित निर्णय कार्यान्वयन गर्ने सन्दर्भमा उत्पन्न हुन सक्ने समस्याहरु समाधान गर्न कार्यदल बनाइएको छ । कार्यदलमा ईश्वर पोखरेल, भीम रावल, विष्णु पौडेल, घनश्याम भुसाल, सुरेन्द्र पाण्डे र लेखराज भट्ट रहनु भएको छ । एमालेले २०७५ साल जेठ २ गतेको सदस्यतालाई आधार मानेर पार्टीको सदस्यता नविकरण गराउने निर्णय पनि गरेको छ । एमालेले पार्टीको विधान महाधिवेशन असोज ४, ५ र ६ गते काठमाडौंमा गर्ने र पार्टीको दशौं महाधिवेशन मंसीर १०, ११ र १२ गते काठमाडौंमा आयोजना गर्ने निर्णय पनि गरेको छ । विधान महाधिवेशनमा प्रस्तुत गर्ने प्रस्तावहरुमाथि छलफल गर्न आगामी भदौ २५ र २६ गते पार्टी स्थायी समिति र २७ र २८ गते केन्द्रिय समिति बैठक बोलाउने निर्णय पनि गरिएको प्रवक्ता ज्ञवालीले बताउनु भयो । एमालेले पार्टी महाधिवेशनको तयारीका लागि कार्तिक ६ गते वडा अधिवेशन र कार्तिक ९ गते पालिका वा सो सरहको कमिटीको अधिवेशन सम्पन्न गर्ने पनि जानकारी गराएको छ । प्रवक्ता ज्ञवालीले पार्टी एकताको सन्देश दिने गरी देशभर आगामी भदौ १६–२० गतेसम्म केन्द्रिय प्रशिक्षकहरुको उपस्थितिमा सबै जिल्लामा जिल्ला कार्यकर्ता भेला र जनसंगठनहरुको केन्द्रिय कार्यकर्ता भेला आयोजना गर्ने बताउनु भयो । स्थायी समिति बैठकले आज गरेको निर्णय एमालेले भोली (९ गते) तुलसीलाल स्मृति प्रतिष्ठान भवनमा पत्रकार सम्मेलन गरी सार्वजनिक गर्ने निर्णय पनि गरेको छ । पार्टी अध्यक्ष केपी शर्मा ओलीलगायतका नेताहरुको उपस्थितिमा पार्टीको निर्णय सार्वजनिक गरिने पनि एमालेले जानकारी गराएको हो । एमालेले स्थायी समितिको आजको बैठकको निर्णयलाई अनुमोदन गर्न यही भदौ १० गते केन्द्रिय कार्य समितिको बैठक पनि बोलाएको छ ।
