दिल्ली, 16 सितंबर 2022
भारतको कर्नाटकमा बौद्ध शिक्षा दिन भन्दै नाबालकलाई अबैध तवरले त्यता पुर्याउने गिरोह सक्रिय रहेको रहस्य खुलेको छ। एक जनालाई लगेबापत भारतीय गुम्बाले कमिसन दिने गरी नेपालमा उनीहरूका एजेन्टले काम गरिरहेका छन्।
सो कार्यमा तिब्बती नागरिकसमेत संलग्न रहेको पाइएको छ। नाका छलेर रुपन्देहीको जंगलको बाटो भारत पुर्याइएका 6 वर्षदेखि 14 वर्ष उमेरका १६ बालकलाई शान्ति पुनःस्थापना गृह ललितपुरको टोलीले बिहीबार उत्तर प्रदेशको बस्ती शहरबाट उद्धार गरेको छ।
‘बालकलाई भारत लैजान जिल्ला प्रशासन, जिल्ला प्रहरी, स्थानीय तह, परराष्ट्र मन्त्रालय कतैबाट अनुमति लिएको पाइएन’, बालकलाई परिवारको जिम्मा लगाउन नुवाकोटमा जाँदै गरेका गृहका क्षेत्रीय संयोजक भूमिराज भट्टराईले टेलिफोनमा भने, ‘रुपन्देहीको कक्रोहवामा खुला बोर्डरबाट बालकहरूलाई भारत पुर्याइएको रहेछ।’
नेशनल लाइभ टी.भीलाई प्राप्त जानकारी अनुसार भारतको देहरादुनमा मानव बेचबिखनबिरुद्ध काम गर्ने हेल्प क्रस ट्रस्ट नामको संस्थासँग समन्वय गरी उद्धार गरिएको संयोजक भट्टराईले सुनाए। उनका अनुसार भारतीय प्रहरीले एक नेपाली र तिब्बती नागरिकलाई नियन्त्रणमा लिएको छ।’
रौतहटका 11 देखि 16 वर्षसम्मका 6 नाबालक भारतमै छन्। उनीहरूको कागजात नभएकाले बिहीबार उद्धार हुन नसकेको हो।
भट्टराईका अनुसार उद्धार गरिएकामध्ये सबैभन्दा धेरै नुवाकोटका 10 जना छन्। रसुवाका पाँच र कैलालीका एक जना छन्। उनीहरूमध्ये 3 जना 6 वर्षका छन्। एक जना मात्र 14 वर्षका छन्। अन्य 9 वर्षमुनिका छन्।
‘म नेपालगन्जको एउटा कार्यक्रममा थिएँ। 15–20 जना नेपाली नाबालकहरू भारतीय बस्ती सहरमा रेलमा बसिरहेका छन् भन्ने खबर आयो। हामीले त्यहाँको रेलवे प्रहरी फोर्सको सहयोगमा उद्धार गर्न सफल भएका हौं’,
उनले भने। त्यसपछि बच्चाहरूको घरपरिवारसँग समन्वय गरेको उनको भनाइ छ। भने, ‘जिल्ला प्रहरी कार्यालय र जिल्ला प्रशासन कार्र्यालय नुवाकोट, रसुवा र कैलालीको पत्र र स्थानीय तहको सिफारिस र भारतीय दूतावासमार्फत हामीले उद्धारका लागि पहल गरेका हौं।’
अवैध रूपमा भारत पुर्याइएका बालकहरू उच्च जोखिममा रहेको निष्कर्ष संस्थाले निकालेको छ। ‘नेपालबाट अवैध बाटोबाट लगिएकाले नाबालकहरू उच्च जोखिममा हुन्छन्।
उनीहरूलाई बेचबिखन हुने खतरा पनि हुन्छ। यो शिक्षाका नाममा ठगी पनि हो। मानव बेखबिखन पनि हो’, भट्टराईले भने। यी बालकलाई भारतबाट रुपन्देहीको कृष्णनगर नाका हुँदै नेपाल ल्याइएको हो। दुई गाडीमा नुवाकोट, रसुवा र काठमाडौं लगिएको छ। नुवाकोट, रसुवा र कैलाली प्रहरीले घटनामा संलग्न गिरोहबारे खोजी गरिरहेको छ। नेपाली बालकलाई भारतीय गुम्बामा लगेर फ्री तिब्बत अभियानबारे प्रशिक्षण दिन खोजिएको आशंका सरोकारवालाको छ।
