पूर्वराजालाई नेपाललाई अँध्यारो युगमा फर्काउने कोसिस नगर्न माधव नेपालको चेतावनी
काठमाडौं ,2 नोभेम्बर 2023
बिहीबार बसेको प्रतिनिधिसभाको बैठकमा बोल्दै नेकपा (एकीकृत समाजवादी) का अध्यक्ष तथा पूर्व प्रधानमन्त्री माधवकुमार नेपालले नेपाललाई अँध्यारो युगमा फर्काउने कोसिस नगर्न पूर्वराजा ज्ञानेन्द्र शाहलाई चेतावनी दिएका छन् ।
आज बसेको प्रतिनिधिसभाको बैठकमा बोल्दै अध्यक्ष नेपालले यस्तो चेतावनी दिएका हुन् ।
उनले भने,‘समस्या देश सञ्चालन गर्ने प्रधानमन्त्रीमा हो कि राष्ट्रपतिमा हो ? यो देशमा मधेसीको एउटा छोरो राष्ट्रपति भएकोमा पीडा भइरहेको छ ? कि एकजना नेपालकी छोरी राष्ट्रपति भएकोमा पीडा भइरहेको छ ? ।’
उनले देश सञ्चालन गर्ने कुरामा पीडा भएको हो भने राजनीतिमा विकल्पहरु दिन पनि ज्ञानेन्द्रलाई चुनौती दिए । उनले भने,‘राजनीतिमा विकल्प दिएर जनतामा आशा जगाउनुस् तर यो व्यवस्थामा प्रश्न गर्ने अधिकार तपाईँलाई छैन् ।’ सो क्रममा प्रमुख प्रतिपक्षी दल नेकपा (एमाले) को भूमिकालाई लिएर पनि आलोचना गरे । उनले भने, ‘सरकारलाई मात्रै दोष दिएर हुँदैन प्रतिपक्षले पनि आफूभित्रको कमजोरी हेर्नुपर्छ ।’ उनले एमालेले सत्ताबाट हट्नुपर्ने पीडाले सदनलाई अवरोध गरेर सरकारलाई असहयोग गर्नेगरी व्यक्त गर्ने काम गरेको आरोप लगाए ।
