सिड्नी, 21 अगस्त 2021
कोरोना भाइरस नियन्त्रणका लागि सरकारले लगाएको लकडाउनको विरोध गर्दै अष्ट्रेलियाका विभिन्न सहरमा प्रदर्शन गरिएको छ । सिड्नी, मेलबर्न लगायतका सहरमा सरकारद्वारा घोषणा गरिएको लकडाउनको उल्लंघन शनिबार गर्दै प्रदर्शन गरिएको हो । प्रदर्शनका क्रममा केही स्थानमा झडपसमेत भएको स्थानीय सञ्चारमाध्यमहरुले जनाएका छन् । सुरक्षा अधिकारीले लकडाउनलाई रोक्नका लागि सयौं सुरक्षाकर्मी परिचालन गरेका थिए । समाचारमाध्यमहरुका अनुसार अष्ट्रेलियाको करिब आधा जनसंख्या अहिले लकडाउनमा रहेका छन् । लकडाउनका विरुद्धमा शनिबार आयोजित प्रदर्शन असफल बनाउनका लागि न्युसाउथ वेल्समा करिब १५ सयको संख्यामा सुरक्षाकर्मी परिचालन गरिएको थियो भने सार्वजनिक सवारीका साधन ट्याक्सी, राईड्स सेयरलाई शनिबार बिहान ९ बजेदेखि ३ बजेसम्म सिड्नीमा यात्रु ओसार्न प्रतिबन्ध लगाइएको समाचारमा बताइएको छ । केही साताअघिसम्म अत्यन्तै न्यून संख्यामा रहेको अष्ट्रेलियाको कोरोना भाइरस संक्रमण पछिल्लो समयमा दैनिक बढिरहेको छ । अहिले सिड्नी, मेलबर्न र राजधानी क्यानबेरामा लकडाउन लगाइएको छ भने अन्तरराज्य सिमानासमेत बन्द गरिएको छ ।
