महेन्द्रनगर, 20 मई 2020
भारतमा लकडाउन खुकुलो भएपछि नेपाल भारत सीमा बनबसा पुगेका सयौं नेपालीहरु आज नेपाल प्रवेश गरेका छन । आईतबार प्रमुख जिल्ला अधिकारी नूरहरी खतिवडाको अध्यक्षतामा बसेको जिल्ला सुरक्षा समितिको बैठकले अलपत्र परेकाहरुलाई गड्डाचौकी नाका भएर भित्रिन दिने निर्णय गरेपछि जिल्ला प्रशासन कार्यालय कञ्चनपुरले आज दिँउसोपछि उनिहरुलाई नेपाल फर्किन दिइएको हो । यसअघि गौरीफन्टा लगायत अन्य प्रदेशका रुपैडिहा, सुनौली, जोगबनी लगायतका नाकाहरुबाट सीमामा पुगेका नेपालीहरुलाई नेपाल भित्र्याइए पनि गड्डाचौकी नाकामा कोरोना परीक्षणका लागि किटको व्यवस्था नभएको भन्दै सयौं नेपालीहरुलाई नेपाल पस्न दिइएको थिएन। हिजो बसेको बैठकले कोरोना परीक्षण नगरेपनि सामान्य स्वास्थ्य परीक्षणपछि प्रवेश गर्न दिने निर्णय अनुसार आज ठूलो संख्यामा नेपालीहरु प्रवेश गरेका छन । नेपाल प्रवेश गरेपछि भारतबाट आएका नेपालीहरुलाई भन्सार कार्यालयको परिसरमा राखिएको थियो भने त्यहाँ महेन्द्रनगरका उद्योगी-व्यवसायी र पत्रकारहरुले खानाको व्यवस्था गरेका थिए । आज साँझ 6 बजेसम्म करिब 3 हजारको संख्यामा रहेका नेपालीहरुलाई आज नेपाल भित्र्याइएको छ भने भोलीदेखि विहान 6 बजेदेखि साँझ 6 बजेसम्म नेपाल भित्र्याउने तयारी कञ्चनपुर जिल्ला प्रशासनले गरेको छ । नेपाल भित्र्याएसँगै नेपालीहरुलाई उनिहरुको स्थानिय गाँउपालिका, वडा र नगरपालिकामा पठाउने तयारी पनि प्रशासनले गरेको छ ।
स्वदेश प्रवेशको बाटो खुल्ला भएको जानकारी पाएपछि आज बिहानैबाट सीमावर्ती क्षेत्रमा अलपत्र परेका नेपालीहरु नाकामा पुगेका थिए । नेपाल भित्रिने अधिकांश नेपालीहरु सुदुरपश्चिम प्रदेशकै नागरिक रहेका छन भने केही कर्णाली प्रदेश लगायत अन्य प्रदेशका नागरिकहरु पनि रहेका छन ।
