नयाँ दिल्ली, 2 सेप्टेम्बर
भारतको हरियाणा राज्यको गुरुग्राममा रहेको मेदान्ता अस्पतालमा कार्यरत विराटनगरका डा. सुजितकुमार साहले मंगलबार आत्महत्या गरेका छन ।
डा. साहले गुरुग्राम सेक्टर -47 स्थित हीवो सोसाइटीमा आठौँ तल्लाबाट मंगलबार बिहान हाम फालेर आत्महत्या गरेका थिए।
डाक्टर साहले आत्महत्या गर्नुअघि कोलकातामा रहने आफ्नी पत्नी डाक्टर लक्ष्मीसित फोनमा कुरा गरेको पुलिसले जनाएको छ । मृतक डाक्टरको फोन कल र डाक्टर साहले आत्महत्या गर्ने कुरा पत्नी लक्ष्मीको बयानको आधारमा पुलिसले उनिहरुबिच 2 मिनेट कुरा भएको र त्यस क्रममा डाक्टर साहले आत्महत्या गर्न लागेको बताएको र उनकी पत्नी लक्ष्मीले उनलाई आत्महत्या नगर्न सम्झाएर फोन काटेको बताएको छ । फोन काटिएपछि डाक्टर साहले वाट्स एप म्यासेज समेत गरेका थिए । त्यसपछि पत्नी लक्ष्मी डराएर तुरुन्तै गुरुग्राम पुलिसको कन्ट्रोल रुममा सूचना दिएकी थिइन । तर पुलिस साहको फ्लैटमा पुग्दा सम्म उनले आत्महत्या गरिसकेको पुलिसले जनाएको छ ।
पुलिसले घरायसी झगडाका कारण डाक्टर साहले आत्महत्या गरेको अनुमान गरेको छ । डाक्टर सुजित र डाक्टर लक्ष्मीको 2010 मा विवाह भएको थियो । उनिहरुको 6 वर्षकी एक छोरी पनि छिन । डाक्टर साह गुरुग्रामको मेदान्ता अस्पतालमा कार्यरत थिए भने लक्ष्मी कोलकातको एक नीजि अस्पतालमा कार्यरत छिन । उनिहरु पछिल्लो 2 वर्षदेखि अलगअलग बस्दै आएका थिए ।
डाक्टर साहको पारिवारिक स्रोतका अनुसार पति-पत्नीबिचको सम्बन्धमा विवाद थियो । र उनिहरुको वैवाहिक सम्बन्ध विच्छेद हुने अवस्थामा पुगेको थियो । त्यसै कारण पनि डाक्टर साह तनावमा आएर आत्महत्या गरेको हुन सक्ने अनुमान गरिएको छ । डाक्टर साहको आत्महत्याको खबरपछि बिराटनगर 13 आश्रम टोलबाट डाक्टर साहका बुवा नरेन्द्रप्रसाद साह, मृतकका भाइ सन्दिप र काका अजय साह बुधबार गुरुग्राम पुगेको जानकारी पाईएको छ ।
परिवारलाई लक्ष्मीले नै फोन गरि आत्महत्याको बारेमा जानकारी दिएको बुझिएको छ ।
