धनगढी, 5 सेप्टेम्बर, हिम शाह जिल्ला प्रशासन कार्यालय कैलालीले कोरोना भाईरसको संक्रमणलाई नियन्त्रण गर्न कैलालीमा लागू गरेको निषेधाज्ञालाई आजदेखि खुकुलो पारिएको छ। निषेधाज्ञा हटाएपनि सेवाग्राहीको घुईचो हुने जिल्ला प्रशासन कार्यालय, यातायात व्यवस्था कार्यालय, आन्तरिक राजस्व कार्यालय, मालपोत कार्यालयका सेवाग्राही नागरिकहरुका लागि भने भदौ ३१ गतेसम्म बन्द नै रहनेछन् । यी कार्यालयहरु अत्यावश्यकीय कामका लागि भित्रि रुपमा खुला रहनेछन ।
भदौ ३१ गतेसम्म जिल्ला प्रशासन कार्यालयले नागरिकता, राहदानी वितरण गर्ने कार्य बन्द रहने जनाएको छ ।
प्रमुख जिल्ला अधिकारी यज्ञराज बोहराले आदेश जारी गर्दै निषेधाज्ञालाई खुकुलो बनाएका हुन्। यसअघि भदौ ४ गतेदेखि १९ गते मध्यरातिसम्म अत्यावश्यक बाहेक सम्पूर्ण सेवा बन्द गरिएकोमा आजदेखि ३१ भदौसम्म लागु हुने गरी खुकुलो पारेर निषेधाज्ञालाई निरन्तरता दिइएको हो।
प्रजिअ बोहराले बिहान ५ बजेदेखि साँझ ७ बजेसम्म बजार खुला रहेपनि साँझ ७ बजेदेखि बिहान ५ बजेसम्म भने सबै चिज बन्द रहने बताए ।
जिल्ला प्रशासन कार्यालयका अनुसार साँझ ७ बजेदेखि बिहान ५ बजेसम्म भने निषेधाज्ञा यथावत रहनेछ ।
आजदेखि कैलाली जिल्ला भित्र सार्वजनिक र नीजि सवारी साधनहरु चल्न दिईनेछ । चैत ११ पछि पहिलो पटक यस्तो निर्णय गरिएको हो । यद्यपि जिल्लाभित्र सवारी साधन चलाउन जोर बिजोर प्रणाली लागु गर्नुका साथै सवारी साधन सञ्चालन गर्दा यात्रु संख्या र मापदण्ड भने तोकिएको छ ।
