धनगढी, 1 अप्रेल/ हिम शाह
सुदूरपश्चिम सरकारले खडा गरेको कोरोना भाईरस जोखिम नियन्त्रण, रोकथाम तथा व्यवस्थापन कोषमा ४० करोड २७ लाख १६ हजार ५ सय ५१ रुपैँया जम्मा भएको छ। कोषमा प्रदेश सरकारको ४० करोडसमेत गरी हालसम्म उक्त रकम जम्मा भएको आर्थिक मामिला तथा योजना मन्त्री झपटबहादुर बोहराले जानकारी दिनुभएको छ। मन्त्री बोहराले फेसबुक पेजबाट लाईभ दिदै कोषमा हालसम्म जम्मा भएको रकमबारे जानकारी दिनुुुभएको हो।
उहाँका अनुसार कोराना जोखिम नियन्त्रण कोषमा सिद्धार्थ बैँक लिमिटेडले १० लाख, सिटिजन्स बैँकले ७ लाख, कृषि विकास बैँक र नेपाल बैँक लिमिटेडले समान ५/५ लाख रकम सहयोग गरेको छ। यस्तै कोषमा धनगढीका आठ जनाले पनि १६ हजार ५ सय ५१ रुपैयाँ जम्मा गरेको मन्त्री बोहराले बताउनुभएको छ। केही बैँक तथा वित्तिय संस्थाले समेत सहयोग घोषणा गरेका छन्। घोषित रकम प्राप्त भए खातामा ४० करोड ४२ लाख बढि रकम जम्मा हुने उहााँले बताउनुुुभयो।
प्रदेश सरकारले विश्वव्यापी महामारीका रुपमा फैलिएको कोरोना भाईरस (कोभिड–१९) को जोखिम नियन्त्रण, रोकथाम तथा व्यवस्थापनका लागि छुट्टै कोष खडा गरेको हो। धनगढीको राष्ट्रिय वाणिज्य बैँकमा खडा गरिएको कोषमा विभिन्न संघसंस्था तथा सर्वसाधारणले समेत सहयोग रकम जम्मा गर्न सक्नेछन्।
