नयाँ दिल्ली, 21 अक्टोबर
भारतको गाजियावादबाट उद्धार गरिएका 19 जना र दिल्लीबाट उद्धार गरिएका 5 जनासहित 24 जनालाई परिवारको जिम्मा लगाउनका लागि भन्दै महिला, बालबालिका तथा जेष्ठ नागरिक मन्त्रालयको जिम्मा लगाइएको छ । भारतको उत्तर प्रदेशस्थित गाजियाबादबाट गत 28 सेप्टेम्बरका दिन उद्धार गरिएका 19 बालक र दिल्लीबाट उद्धार गरिएका ४ किशोरीसहित 5 जनालाई मंगलबार सुनौली बोर्डरमा मन्त्रालयको जिम्मा लगाएको आफन्त नेपालका दिल्ली प्रतिनिधि नवीन जोशीले बताउनु भयो ।
गाजियाबादबाट उद्धार गरिएका बालकहरुको उमेर 13 देखि 16 वर्ष रहेको छ । उनिहरुलाई राम्रो रोजगारीमा लगाउने भन्दै भारत पुऱ्याइएको थियो । उनिहरुलाई लिएर आउने 4 जना भने अझै नियन्त्रणमा रहेका छन । उनिहरुविरुद्ध मानव ओसारपसार ऐनविरुद्धको कानून लगाइएको छ ।
उद्धार गरिएका 19 जना सबै नवलपरासी जिल्लाका विभिन्न ठाँउका वासिन्दा हुन । उनिहरुलाई परिवारको मिलेमतोमै भारत लगिएको भन्ने समाचारहरु आएपनि उद्धार गरिएका सबै बालकहरु नाबालक भएका कारण उनिहरुको उद्धार गरि नेपाल फिर्ता पठाइएको हो । दिल्लीबाट उद्धार गरिएका एक बालक सुर्खेतका, २ किशोरी बारा, १ जना रुपन्देही र १ किशोरी पर्वतका रहेका छन्।
घटनापछि उनिहरुको उद्धार र परिवारमा पुनर्मिलनका लागि नेपाल सरकारको महिला, बालबालिका तथा जेष्ठ नागरिक मन्त्रालयले आफ्नो अध्यक्षतामा राष्ट्रिय बाल अधिकार परिषद, नेपाल प्रहरी र आफन्त नेपालको सहभागितामा एक समिति गठन गरेको थियो।
आफन्त नेपालका निर्देशक इन्द्रराज भट्टराईका अनुसार गाजियावादमा उद्धार गरिएका १९ बालक र दिल्लीबाट उद्धार गरिएका 4 किशोरीसहित 5 जनालाई दिल्लीस्थित नेपाली दूतावास र आफन्त नेपालको पहलमा सुनौली नाकासम्म ल्याइएको र त्यहाँदेखि मन्त्रालयको रोहवरमा गठीत मन्त्रालय, राष्ट्रिय बाल अधिकार परिषद, नेपाल प्रहरी र आफन्त नेपालका सदस्य सम्मिलित समितिले जिम्मा लिएर परिवारको जिम्मा लगाएको बताउनुभयो ।
