नेपालगञ्ज, 2 अप्रेल/ हिम शाह
विश्वव्यापी रूपमा फैलिएको कोरोना महामारी रोकथामका लागि नेपाल र भारतमा समेत लकडाउन भएर सीमानाका बन्द हुँदा 1 सय 79 जना नेपालीहरूमै दशगजामै सुत्न बाध्य भएका छन्। अघिल्लो राति जयसपुर र हिरमिनियाको खेतमा सुतेका नेपालीलाई भारतको क्वारेन्टाइन लैजाने अधिकारीहरुले सहमति गरेपनि उनिहरु जान नमानेर दशगजामै बसेका हुन्। बाँकेका प्रमुख जिल्ला अधिकारी कुमार बहादुर खड्का, एसपीहरु बीर बहादुर ओली, दीपक अधिकारी, कमल भट्टराई र भारत बहराइचका डीएम शम्भु कुमार र एसपी विपिन कुमार बीच नाकामा अलपत्र परेका नेपालीलाई आधा-आधा गरी व्यवस्थापन गर्ने सहमति भएको थियो।
सहमति अनुसार जयसपुर र हिरमिनियामा रहेका नेपालीलाई जमुनाहा नाकामा ल्याइयो। नेपालीहरू जमुनाहा नाका पुगे त्यसपछि आधा-आधाको संख्यामा नभएर सबै एकै ठाउँमा जाने अडान नेपालीहरूले कसे।नेपाली अधिकारीले भारतीय पक्षलाई त्यो कुरा सम्झाए। सबैलाई लैजान भारत तयार भयो। तर, दशगजामा पुगेपछि नेपालीहरुले फेरि विचार बदले, भारत जान्न भन्न थाले। ‘भारतबाट धेरै हण्डर, दुःख झेलेर नेपालमा आइपुगेका छौं। फेरि भारत जाँदैनौँ’, नेपालीहरुले एकै स्वर भने।
त्यसपछि नेपाली र भारतीय अधिकारीहरुलाई आपत आइलाग्यो। एसपी, प्रजिअले सम्झाइरहे, उनीहरुले इन्कार गरिरहे। त्यसबीचमा प्रदेश सांसद कृष्णा केसी नमूना पनि पुगिन्। सबैले मिलेर राती पौने एघार बजेसम्म सम्झाए। नेपालीहरुले भारतीय क्वारेन्टाइनमा जान मान्दै मानेनन्। उनीहरु भारतबाट आएको तीन दिन भइसकेको थियो। यो तीन दिन उनीहरुले सडक र खेतमा मै बिताए।
अब 11 दिन भारतीय क्वारेन्टाइनमा गएर सुरक्षित बसिदिन र त्यसपछि घरघरमा पठाइदिन्छौँ भनेर नेपाली अधिकारी र सांसदले सम्झाउँदा नेपालीहरुले भारत नजाने अडान दोहोर्याईरहे। रुकुमका सन्दीप केसीले भने, ‘धेरै दुःख पाएर आफ्नो भूमिसम्म आएका छौं। फेरि भारत जाँदैनौँ। यही खेतमा सुत्छौं जति दिन बस्नु पर्छ।’
‘जति दिन बस्नु पर्छ। हामी खेतमै बस्छौं। जंगलमा राखिदिनुस्। तर, फेरि भारत जाँदैनौँ, नेपालीहरुले एक स्वरमा भनिरहे’, प्रदेश सांसद केसीले भनिन्, ‘जति सम्झाए पनि जान्नाैँ भनेपछि के गर्ने लठ्ठी हान्नु भएन। त्यही दशगजामै छन्।’
खासमा नेपाल र भारतका अधिकारीका बीचमा नेपालमा भएका भारतीयलाई नेपालले क्वारेन्टाइनमा राखिदिने र भारतबाट आएर नाकामा अलपत्र परेकालाई भारतले क्वारेन्टाइनमा राखिदिने सहमति भएको छ। जति सम्झाउँदा पनि केही सीप नलागेपछि अधिकारीहरु एघार बजे राति नाकाबाट फर्किएका थिए। त्यसपछि नेपालीहरु दशगजामै सुते। नाकातिर नै रहेको महेन्द्र बहुमुखी क्याम्पसमा क्वारेन्टाइनमा बनाइएको छ।
नेपाली अधिकारीहरुले उनीहरुलाई त्यहाँसम्म ल्याउन सकेका छैनन्। ‘माथिको आदेश’ नहुँदासम्म केही गर्न नसकिने अधिकारीहरुले बताइरहेका छन्। स्रोतका अनुसार, माथिबाट जहाँ छन्, त्यही राख्नु भन्ने निर्देशन रहेको छ।
