दार्जीलिङ १५ अप्रेल
दार्जीलिङमा भ्रामक खबर भाइरल गर्ने एक व्यक्तिलाई पक्राउ गरिएको छ । शहरमा आज बिहानै हरियाणाको नम्बर प्लेट भएको एक बस देखिएको भीडीओ भाइरल भएपछि दार्जीलिङ सदर थानाका आइसी टीएस नाथले विदेशी पर्यटकलाई लिन बस आएको बताउनुभयो ।
जानकारीका अनुसार दुई जना स्पेन अनि एक जना पोर्तुगलका पर्यटकहरू लक डाउनको कारण एक महिनादेखि दार्जीलिङमा बिचल्ली परेर फसेका थिए। ती पर्यटकहरूले भारतमा अवस्थित आ-आफ्नो दूतावासमा सम्पर्क गरेका थिए । त्यसैको आधारमा पोर्तुगल अनि स्पेन दूतावासले भारत सरकारको अनुमति लिएर, सम्पूर्ण औपचारिकतासहित विचल्लीमा परेका आफ्नो नागरिकहरूलाई लैजान दार्जीलिङमा विशेष रुपले बस पठाएको थियो । हरियाणाको नम्बर प्लेट भएको उक्त बस दार्जीलिङ क्लब साइडमा राखिएको थियो । जुन बस दिल्लीबाट पठाइएको थियो। जुन बसको अन्तर राज्य पास पनि थियो । ती पर्यटकहरुलाई विशेष विमानबाट दिल्ली पुराएर पनि पोर्तुगल अनि स्पेन पठाउने काम भइसकेको छ । यो घटनाले गर्दा आइसी टीएस नाथले सञ्चारकर्मीहरू मार्फत जनतालाई अनुरोध गर्दै भन्नु भएको छ, अफवाहमा विश्वास नगर्नुहोस, अफवाह फैलाउन नदिनुहोस ।
