नयाँ दिल्ली, 20 जुन 2020, खुम गुरुङ
भारतको दिल्लीमा कोरोना संक्रमणका कारण ज्यान गुमाएका एक नेपालीको अन्त्येष्टी गरिएको छ । परिवारका सदस्यहरु नेपालमा भएकाले कोरोना कारण ज्यान गुमाएको 13 दिनपछि उनको आज दिल्लीमा अन्तिम संस्कार गरिएको हो । दिल्लीमा शव बुझ्ने कोही नभएपछि दिल्लीस्थित सामाजिक संगठन ग्रीन तारा सोसाईटीका कार्यकारी सदस्य कृष्ण गुरुङको पहल र नेपाली जनसम्पर्क समिति भारतका अध्यक्ष बालकृष्ण पाण्डेले शवलाई जिम्मा लिएपछि अन्तेयष्टि गरिएको हो ।
नेजस भारतका अध्यक्ष बालकृष्ण पाण्डेका अनुसार शवको अन्तिम संस्कार गर्न नेपालमा रहेका पारिवारिक सदस्यले आफुलाई पत्राचार गरेको थियो । तर कोरोना संक्रमण र परिवारिक सदस्य नेपालमा भएकाले शव लिन निकै समस्या भएको थियो । शव लिने प्रक्रियाका लागि दिल्लीस्थित नेपाली राजदूतावासको सहयोग माग गरिएपनि 3 दिनसम्म कुनै सहयोग प्राप्त नभएपछि भारतको गृह मन्त्रालयको सहयोगमा शव प्राप्त भएको र अन्ततः आज अन्तिम संस्कार गरिएको पाण्डेले बताउनुभयो ।
दिल्लीको पहाडगंज क्षेत्रमा कुरियर सेवा प्रदान गर्दै आएका झापाको वडा नम्बर 9 सतासीधामका स्थायी वासिन्दा ज्ञानबहादुर बस्नेतको 49 वर्षको उमेर 7 जुनका दिन निधन भएको थियो । गत 4 जुनदेखि स्वाथ्यमा समस्या देखिएका उनलाई 7 जुनमा उनका छोराले असहज भएपछि छेउँमै रहेको लेडीहार्डीङ अस्पताल लगेका थिए। तर सोहीदिन उनको अस्पतालमै मृत्यु भएको हो । मृत्युपछि गरिएको परीक्षणमा उनलाई कोरोना भएको पुष्टी भएको थियो।
