भारतको राजधानी दिल्लीमा मृत्युलाई जितेर फर्किएका एक नेपालीले अहिले परिवारलाई खोजिरहेपनि घरको यकीन ठेगाना थाहा नपाँउदा अलपत्र परेका छन । एक भयानक दुर्घटनाका कारण लामो समयसम्म अचेत रहेका नवलपरासीका 50 वर्षीय रामचन्द्र बहादुर थापाले आफ्नो घरको यकीन ठेगाना भन्न नसक्दा उनलाई नेपाल फर्काउन पनि अफ्ठ्यारो भएको छ । जानकारीका अनुसार धरमपुर -३, सुनवल, नवलपरासीका रामचन्द्र बहादुर थापा एक दुर्घटनापछि दिल्लीमै एक गैर सरकारी संस्थाको संरक्षणमा रहिरहेका छन । दिल्लीस्थित नेपाली राजदूतावास र आफन्त नेपाल संस्थाले उनको घर-परिवार खोज्ने प्रयास गरेपनि अहिलेसम्म केही थाहा हुन सकेको छैन ।
आफन्त नेपालका दिल्ली प्रतिनिधि नविन जोशीका अनुसार रामचन्द्र बहादुर थापाको 3 अप्रेल 2018 मा दुर्घटना भएको थियो । टाउकोमा गम्भीर चोट लागेकाले दिल्ली पुलिसले उनलाई अचेत अवस्थामा सफदरजंग अस्पतालको ट्रमा सेन्टरमा भर्ना गराएको थियो । केही समय कोमामै रहेका उनि केही ठीक भएपछी एक संस्थाले आश्रय दिएको थियो । उनि अहिले बोल्न नसक्ने अवस्थामा रहेकाले उनलाई उनको घरसम्म पुऱ्याउन समस्या भएको जोशीले बताउनु भएको छ । तर उनले लेखेर भएपनि आफ्नो परिवारको व्योहोरा दिएका छन । उनले आफ्नो बुवाको नाम बनबहादुर थापा, श्रीमतीको नाम सौमादेबी, 2 छोराहरु बिक्रम र सुरज थापा, छोरीहरु अनिता र सुनिता भएको बताएका छन । तस्वीरमा देखाइएका व्यक्ति रामचन्द्र बहादुर थापालाई तपाईले चिन्नु भएको छ भने दिल्लीस्थित नेपाली राजदूतावास अथवा आफन्त नेपालको मोबाईल नम्बर +91-9716293602 सम्पर्क गर्न सक्नुहुनेछ ।
