बेङलोर, 10 अप्रेल
नेपाली जनसम्पर्क समिति दक्षिण क्षेत्र भारत बेङलोर (बेलेन्धुर शाखा) ले बेङलोरमा लकडाउनका कारण बेरोजगार भएर खानाको समस्या भएका नेपालीहरुलाई खाद्यान्न वितरण गरेको छ। भारतको कर्नाटक राज्यको राजधानी बेङलोरमा खानाको समस्या भएका नेपालीहरुलाई नेजस दक्षिण क्षेत्र भारतका अध्यक्ष दिवश शाहिको नेतृत्वमा 21 परिवारका 64 जनाका लागि राशन वितरण गरिएको हो।
विश्व महामारीको रूपमा फैलिएको कोरोना भाइरस (कोभिड—19) नियन्त्रणका लागि भारत सरकारले गरेको लकडाउनका कारण उनिहरू काम गर्ने होटल, व्यवसाय, उद्योग तथा कलकारखाना बन्द हुँदा उनिहरू बेरोजगार भएका हुन्। बेरोजगार भएसँगै उनिहरूमा खानाको समस्या देखिएको हो।
बेङलोरको पन्तुर एसबी स्पोर्ट नजिक बसोबास गर्ने सुदूरपश्चिमका विभिन्न स्थानका 21 परिवारका 64 सदस्यहरूका लागि राशन वितरण गरिएको नेजस दक्षिण क्षेत्र भारत अध्यक्ष दिवश शाहि बताउनुभयो। लकडाउनका कारण खाना र बस्नको समस्या भएका नेपालीहरूलाई नेजस दक्षिण क्षेत्र भारतले खाना र बस्नको व्यवस्था मिलाउँदै आएको आध्यक्ष शाहिले बताउनुभयो।
