काठमाण्डौँ, 11 मे 2020
नेपालमा थप 10 जनामा कोरोना भाइरसको संक्रमण पुष्टि भएको छ। कपिलवस्तुका 10 जनामा कोरोना भाइरसको संक्रमण पुष्टि भएको हो। स्वास्थ्य तथा जनसंख्या मन्त्रालयका अनुसार कविलवस्तुको यशोधरा गाउँपालिका–5 र बुद्धभूमि नगरपालिका– 7 र 10 नम्बर वडाका 10 जनामा कोरोना भाइरसको संक्रमण देखिएको हो।
संक्रमितहरुमा 18, 19, 20, 20, 24, 30, 31, 34 र 34 वर्षकै पुरुष रहेका छन्। यस्तै एक जनाको भने उमेर नखुलेको मन्त्रालयले जनाएको छ। उनिहरु सबैको स्वास्थ्य अवस्था सामान्य रहेको साथै स्वास्थ्यकर्मीको सम्पर्कमा रहेको मन्त्रालयले जनाएको छ।
कपिलवस्तुमा यसअघि पनि 5 जना कोरोना संक्रमित फेला परेका थिए। योसँगै कपिलबस्तुमा मात्रै कोरोना संक्रमितको संख्या 15 पुगेको छ। यसैगरी बाँके र रुपन्देही समेत गरी प्रदेश नम्बर 5 मा 40 जना फेला परेका छन्। बाँकेमा 24 जना र रुपन्देहीमा 1 जना कोरोना संक्रमितको उपचार भइरहेको छ।
सोमबार 10 नयाँ संक्रमित थपिएसँगै नेपालमा कोरोना संक्रमितको संख्या 120 पुगेको छ। त्यसमध्ये 33 जना निको भएर घर फर्किइकेका छन्।
