काठमाण्डौ, 23 जुलाई 2020
प्रधानमन्त्री केपी शर्मा ओली र विपक्षी दल नेपाली कांग्रेसका नेता शेरबहादुर देउवाबीच बिहीवार भेटवार्ता भएको छ। देशमा बढ्दो कोरोना संक्रमण र लकडाउन खुल्ला गरिएको सन्दर्भमा कांग्रेस सभापति देउवाले बिहीबार बिहान प्रधानमन्त्री निवास बालुवाटार पुगेर प्रधानमन्त्री केपी शर्मा ओलीसँग भेट गर्नुभएको हो ।
देउबाले कोरोना भाइरसको सामना र नियन्त्रण गर्नका लागि विशेष रणनीति निर्माण गर्न प्रधानमन्त्री ओलीलाई सुझाव दिनुभएको छ ।
नेपालमा कोरोना संक्रमितको संख्या बढीरहेको र अहिलेसम्म ४३ जनाको कोरोनाका कारण मृत्यु भइसकेको भन्दै लकडाउन खुलेपछिका चुनौती सामना गर्न नयाँ र विशेष रणनीति बनाउन सभापति देउवाले सुझाब दिएको कांग्रेसले जनाएको छ।
भेटमा सभापति देउवाले विदेशमा अलपत्र नेपालीको तत्काल उद्धार गर्न माग गर्नुभएको छ। उहाँले पीसीआर विधिबाट मात्रै परीक्षण गर्न र क्वारेन्टिनलाई थप व्यवस्थित गराउन समेत माग गर्नुभएको छ।
