नयाँ दिल्ली, 25 मई 2020
मानवतालाई खुट्टाले कुल्चेर प्राय पैसा भन्दा अरु केही नदेख्ने बस सञ्चालकहरुले लकडाउनले मर्ने बाँच्ने अवस्थामा पुगेका नेपालीहरुसँग घर पुर्याइदिने नाममा उनिहरुसँग भए भरको पैँसा कुमल्ने गरेका छन । सीमामा पुर्याएपछि नेपाल छिर्न पाउने ठेगान नभएका बेला भाडामा बस लिएर बस संचालक बन्ने केही दलालहरुले यस विपदका बेला मनलाग्दी भाडा असुलिरहेका छन । हुन त भारतमा भएको लकडाउनले रोजगारी गुमाएर एक छाक पेटभरि खान पनि नपाउने अवस्थामा रहेका नेपालीहरुसँग नेपाल फर्किने बाहेक अर्को विकल्प छैन तर केही बस सञ्चालकहरुले यसै परिस्थितिको फाइदा उठाएर उनिहरुको अवस्थाभन्दा तेब्बर चौबल पैसा लिइरहेका छन । अहिले नेपालका प्रायजसो सबै नाकामा छोड्ने बस संचालकहरुले तेब्बर चौबल भाडा उठाँउदा 2 महिनाको लकडाउनले गोजी रित्याएका नेपालीहरु मर्कामा परेका छन । कयौंले अहिलेनै बसको यात्रा गर्न सकेका छैनन भने अन्य साथी-भाईसँग ऋणकर्जा गरेर पनि नेपाल फर्किरहेका छन । हामीले ती बस सञ्चालकहरुलाई यात्रु भएर फोन गर्दा 6 सय रुपैयाँसम्म भाडा हुने बनबसाका लागि 25 सयदेखि 3 हजार, साढे 6 सयसम्म भाडा हुने गौरीफण्टासम्मका लागि 3 हजारदेखि 4 हजार लिने गरेका छन । त्यसैगरि सुनौली नाकामा पनि 35 सय देखि 4 हजार रुपैयाँ लिएर यस्ता टूर एण्ड ट्राभल्सवालाहरुले सीमामा पुर्याइरहेका छन । यस्तै देशका अन्य सीमा पनि भइरहेको छ ।
सीमामा पुगेपछि पाईने दुःख आफै झेल्नुपर्ने शर्तमा उनिहरुले सीमामा पुर्याइरहेका छन । हुन त भाडा अनुसारको सेवा दिनुपर्ने यस्ता टूर एण्ड ट्राभल्सवालाहरुको काम हो तर उनिहरुमाथि कुनै निकायको नियमन नहुँदा उनिहरुको मनमर्जी चलिरहेको हुन्छ । कोरोना महामारी अघि उच्च भाडाका साथै क्षमताभन्दा धेरै यात्रु बोक्ने गरेका यात्रुहरुले अहिले एसी बस भनेर मान्छे भर्ने काम गरेपनि बसमा एसी नहुने गरेको प्रभावित यात्रुहरुले बताएका छन । कोरोना महामारीका कारण बसमा थोरै यात्रु भर्नुपर्ने दिशानिर्देश भएपनि समस्यामा परेका यात्रुलाई राहत दिन अहिले टूर एण्ड ट्राभल्सवालाहरुले कम लाभ लिएर सेवा दिएको राम्रो हुने प्रवासी संगठनहरुको भनाई छ ।
