नयाँ दिल्ली, 17 सेप्टेम्बर 2020
भारतका प्रधानमन्त्री नरेन्द्र मोदी आज 70 वर्षको हुनुभएको छ । प्रधानमन्त्री मोदीको जन्मदिनलाई भारतीय जनता पार्टीले ‘सेवा सप्ताह’ को रुपमा मनाइरहेको छ । प्रधानमन्त्रीको जन्मदिनको अवसरमा उहाँलाई देश विदेशबाट शुभकामना दिनेको लोर्को लागेको छ । राष्ट्रपति रामनाथ कोविन्द, गृहमन्त्री अमित शाह, रक्षा मन्त्री राजनाथ सिंह, कांग्रेस नेता राहुल गांधी र अन्य ठूला नेताहरुले पनि प्रधानमन्त्री मोदीलाई जन्मदिनको शुभकामना दिएका छन ।
प्रधानमन्त्री केपी शर्मा ओलीले पनि भारतीय समकक्षी नरेन्द्र मोदीलाई ७० औं जन्मदिनको अवसरमा शुभकामना दिनुभएको छ । बिहीबार बिहान ट्वीटरमार्फत उहाँले मोदीलाई शुभकामना दिनु भएको हो । प्रधानमन्त्रीले ओलीले मोदीलाई सु–स्वास्थ्य र खुशीको कामना गर्दै हामी दुई देशबीचको सम्बन्धलाई अझ प्रगाढ बनाउन निरन्तर लाग्ने ट्वीटरमा लेख्नु भएको छ ।
प्रधानमन्त्री नरेन्द्र मोदीको जन्म 17 सेप्टेम्बर 1950 मा गुजरातको वडनगरमा भएको थियो । युवा अवस्थामा उहाँले आफ्नो परिवारलाई छोडेर संघमा जोडिनु भएको थियो । भारतीय जनता पार्टीमा विभिन्न पदमा काम गरेपछि मोदी 2001 मा गुजरातको मुख्यमन्त्री बन्नु भएको थियो र 2014 सम्म सो पदमा रहनु भएको थियो । 2014 देखि उहाँ भारतको प्रधानमन्त्री पदमा रहनु भएको छ ।
