नयाँ दील्ली , १७ जनवरी २०२०
बुधबार भारतमा मृत अवस्थामा भेटिएका बाँकेको कोहलपुर नगरपालिकाका वडाध्यक्ष कृष्णबहादुर खड्काको शुक्रबार विहान अन्त्येष्टि गरिएको छ ।
भारतको बहराइचस्थित शंकर होटलमा मृत अवस्थामा भेटिएका उनको शव बिहीबार नेपाल ल्याइएको थियो । उनको अन्त्येष्टि गरिएको कोहलपुरका मेयर लुटबहादुर रावतले जानकारी दिए । खड्का रहेको होटलको कोठामा २२ पाना लामो ‘सुसाइड नोट’ भेटिएको छ । मेयर रावतले नोटमा खड्काले आर्थिक समस्यामा फसेको उल्लेख गरेका छन् । पारिवारिक स्रोतका अनुसार उनको बैंकमा करिब २० लाख रुपैयाँ ऋण थियो ।
मङ्गलबार सुर्खेतको मेहलकुना जाने भनि घरबाट हिँडेका वडाध्यक्ष खड्का भारतमा मृतवस्थामा भेटिएका थिए । ‘पहिले नोट भेटिएको थिएन । खाटको किनारमा अड्किएको रहेछ’ । मेयर रावतले जानकारी दिए । खड्का परिवार जाजरकोटबाट बसाइँ सरेर कोहलपुर आएको थियो । उनी २९ पुसमा सुर्खेत जान भनेर घरबाट निस्किएका थिए ।
