कञ्चनपुर, 12 मई / हिम शाह
भारतमा 45 दिन क्वारेन्टाइन बसेका 242 जना नेपालीलाई स्वदेश ल्याइएको छ। कञ्चनपुरको पश्चिमी नाका गड्डाचौकीबाट उनिहरूलाई नेपाल ल्याइएको हो। आइतबार र सोमबार राति गरी 2 दिन सीमावर्ती भारतीय बजार वनवासाको स्कूलमा क्वारेन्टाइन बसेका 251 जनामध्ये पहिलो दिन 75 र सोमबार राति 167 जनालाई भारतीय पक्षसित समन्वय गरी स्वदेश फिर्ता ल्याइएको जिल्ला प्रहरी कार्यालयले जनाएको छ।
कार्यालयका प्रवक्ता प्रहरी नायब उपरीक्षक रवीन्द्र पौडेलले वनवासामा 45 दिन क्वारेन्टाइनमा बसेका नागरिकलाई भारतीय पक्षसित समन्वय गरी स्वदेश ल्याइएको जानकारी दिनुभयो। उनीहरुलाई भीमदत्तनगरस्थित वैजनाथ माध्यमिक विद्यालयमा राखेर आरडीटीका लागि नमूना सङ्कलन कार्य भइरहेको उहाँले जानकारी दिनुभयो।
परीक्षणमा कोरोना नदेखिए पनि सम्बन्धित पालिकामा कम्तीमा 8 दिन क्वारेन्टाइन बस्ने गरी पठाउने काम हुँदैछ,’ उहाँले भन्नुभयो, ‘यहाँ आरडीटी र पीसीआरका लागि नमूना संकलन भइरहेको छ।’ उहाँले आइतबार आएकामध्ये धेरैलाई सम्बन्धित पालिकाको क्वारेन्टाइन पठाइसकिएको बताउनुभयो। ‘भारतमा एक राज्यबाट अर्को राज्य जान खुकुलो बनाएपछि नेपालीहरु सीमामा आउने क्रम बढ्यो,’ उहाले भन्नुभयो, ‘हामीले सतर्कताका साथ काम गरिरहेका छौं।’
भारतीय पक्षले क्वारेन्टाइनबाट घर जान अनुमति दिएका नागरिकले प्रहरीले सीमा क्षेत्रबाट उद्धार गरी यहाँको क्वारेन्टाइनमा कोरोना जाँचका लागि राख्ने गरेको छ ।
