काठमाण्डौ, 4 नोभेम्बर
भारतीय सेनाध्यक्ष जनरल मनोज मुकुन्द नरवणे भारतीय सेनाको विषेश विमानबाट काठमाडौं पुग्नु भएको छ । उहाँ मध्यान्ह त्रिभुवन विमानस्थलमा ओर्लिनु भएको हो । पत्नीसहित काठमाडौं पुग्नु भएका नरवणेलाई नेपाली सेनाका मेजर जनरल प्रभुराम शर्माले स्वागत गर्नुभएको छ । स्वागतपछि उहाँलाई सिधैं सोल्टी होटेल लगिएको छ। तीन दिनसम्म उहाँ सोल्टीमा नै बस्ने कार्यक्रम रहेको छ। उहाँ आउँदा कडा सुरक्षा व्यवस्था गरिएको थियो। सडक किनारामा मानिसलाई उभिनसमेत सुरक्षाकर्मीले दिएका थिएनन्।
भारतीय सेनाध्यक्षले आज पशुपति मन्दिर दर्शन गर्ने कार्यक्रम रहेको छ। लकडाउन पछि सर्वासाधारणका लागि पशुपतिनाथ दर्शनमा रोक लगाइँदै आएको छ। निषेधाज्ञा खुकुलो पारे पनि पशुपतिनाथ दर्शन खुला भएको छैन। नरावणेका लागि भने पशुपति खोलिँदैछ।
सेनाध्यक्ष नरवणेको भ्रमणलाई लिएर काठमाडौं उपत्यकाभित्रको सुरक्षा व्यवस्था कडा बनाइएको छ।
नेपाली सेनाका प्रधानसेनापति पूर्णचन्द्र थापाको निमन्त्रणामा नेपाल भ्रमणमा रहनु भएका भारतीय सेनाध्यक्षले प्रधानसेनापति पूर्णचन्द्र थापासँग दुईपक्षीय हितका विषयमा छलफल गर्नुका साथै नेपाली सेनाका उच्च अधिकारीहरुसँग भेटघाट गर्नुहुनेछ । उहाँले प्रधानमन्त्री केपी शर्मा ओली लगायतसँग भेटघाट गर्ने कार्यक्रम रहेको छ । भ्रमणका क्रममा बिहीबार राष्ट्रपति विद्यादेवी भण्डारीबाट भारतीय सेना प्रमुख मनोज मुकुन्द नरवणेले नेपाली सेनाको मानार्थ महारथीको दर्ज्यानी चिन्ह प्रदान गर्नुहुनेछ । यसअघि नेपाल जानुअघि मंगलबार साँझ एक छोटो भिडियो सन्देश जारी गर्दै नरवणेले नेपाल भ्रमणले दुई देशबीच रहेको सैन्य सम्बन्धलाई मजबुत बनाउन लामो बाटो तय गर्ने बताउनु भएको छ ।
