काठमाडौं, 9 जून 2022
सांसद हृदयेश त्रिपाठीले मलको अभावका कारण किसानहरु समस्यामा परेको भन्दै सरकारको ध्यानाकर्षण गराउनुभएको छ । प्रतिनिधिसभाको बिहीबारको बैठकमा विषेश समय लिएर उहाले मल उपलव्ध गराउन सरकार असफल भएको र किसानहरु समस्यामा परेको बताउनुभएको हो । अहिलेको बजेट निबन्ध मात्रै भएको टिप्पणी गर्दै त्रिपाठीले सरकारले हासिल गर्ने भनेको कृषि उत्पादनको लक्ष्य हासिल गर्न नसक्ने धारणा राख्नुभयो । उहाले मलको अभाव कायमै रहे यस बर्ष धानको उत्पादन घट्ने उल्लेख गर्नुभयो । उहाले घुमुवा प्रहरीले विचौलिकाको काम गरिरहेको बताउनुभयो । यस्तै उहाले बर्दियामा बाघको आक्रमणबाट जोगिन स्थानीयले गरेको आन्दोलनमा प्रशासनको हस्तक्षेप गलत भएको बताउनुभयो । सांसद कृष्णबहादुर राईले काठमाडौँ उपत्यकको फोहर व्यवस्थापन गर्न सरकारको ध्यानाकर्षण गराउनुभयो । फोहरमैला व्यवस्थापनका लागि प्रधानमन्त्रीका साथै गठबन्धनले पनि गम्भीर हुनुपर्ने उहाको भनाई छ । उहाले काठमाडौंका मेयर बालेन्द्र साहलाई एमालेले पूर्णरुपले सहयोग गर्ने, तर साहले संयता अपनाएर अगाडि बढ्न जरुरी रहेको बताउनुभयो । त्यस्तै सांसद गणेशसिंह ठगुन्नाले दार्चुलामा बुधबार एकल महिलालाई आगो लगाएर मारिएको भन्दै त्यस घटनाका दोषीलाई पक्राउ गरी कारवाही गर्न माग गर्नुभयो।
