मुम्बई, 21 जुलाई 2020
मुम्बईमा कोरोनालाई जितेर होम आइसोलेशनमा रहिरहेका हिरा व्यवसायी एक नेपालीले आत्महत्या गर्नुभएको छ । हिरा व्यवसायी मीन बोहराको आज मुम्बईमा अन्तिम संस्कार गरिएको छ ।
अछाम जिल्लाको ओलीगाउँ–४ का स्थायी वासिन्दा मीन बोहरा मुम्बईको अन्धेरीमा बस्दै आउनु भएको थियो । कोराना संक्रमणबाट निको भएर होम आइसोलेशनमा रहेका बोहरा तनावमा रहेको संयुक्त नेपाली महासंघका पूर्वअध्यक्ष भरत रावलले नेशनल लाईवलाई बताउनुभएको छ । रावलका अनुसार बोहराले हिजो बिहान 5 बजे आफु बस्ने बिल्डिङको तेस्रो तलाबाट हाम फाल्नु भएको थियो । बिल्डिङबाट हाम फालेर कम्मर मूनीको शरीर पूर्णरुपमा क्षतिग्रस्त भएका बोहरालाई सोसायटीका सदस्यहरुले नानावटी अस्पतालमा भर्ना गरेका थिए । अस्पताल पुग्दासम्म होसमै रहेका बोहरा त्यसपछि कोमामा गएको र अन्त्यमा राति 9 बजे निधन भएको रावलले बताउनुभयो ।
महासंघका पूर्वअध्यक्ष रावलले भन्नुभयो लामो समयदेखि संयुक्त नेपाली महासंघका पूर्व उपाध्यक्षको रुपमा समाजसेवा गर्नुभएका बोहरा कोरोना संक्रमित भएपछि अस्पतालमा भर्ना हुनुभएको थियो । उपचारले ठीक भइसकेपछि बोहरा घर आइसकेपछि आइसोलेशनमा हुनुहुन्थ्यो । आइसोलेशनमा तनावमा रहनुभएका बोहराले साथीभाईसँग कुरा गर्दा आफुलाई अस्पताल लगिदिन र आत्महत्या गर्ने भन्दै आउनुभएको थियो ।
जानकारीका अनुसार मृतक बोहराका ९ वर्ष र १२ वर्षका दुई छोराहरु छन । तर श्रीमतीसँग सम्बन्ध विच्छेद भइसकेको थियो । कोरोना संक्रमित भएका कारण होम आइसोलेशनमा बस्नुपर्दा उहाँ तनावको शिकार भएको हुनसक्ने अनुमान गरिएको छ । मुम्बईमा रहने नेपालीहरुलाई चाहिएको बेला उपस्थित भएर सेवा गर्ने भएकाले पनि मुम्बईमा उहाँ निकै परिचित हुनुहुन्थ्यो । उहाँको निधनपछि विभिन्न नेपाली संघसंस्था र व्यक्तिहरुले श्रद्धाञ्जली अर्पण गरेका छन ।
