दिल्ली, 9 फरवरी 2022
कोरोना संक्रमणका कारण माघ ३ गतेबाट बन्द भएका हलहरु फागुन १ गतेबाट खुल्दैछन्। २७ दिनपछि हल खुल्न लागेका हुन् । हल खुल्ने भएपछि नेपाली चलचित्रका निर्माताले पनि धमाधम प्रदर्शन मिति तय गर्न थालेका छन् । योसँगै दर्शकले अब अर्को एक फ्रेस भारतीय चलचित्र समेत हेर्न पाउने भएका छन् । फागुन १ गतेबाट साउथको चलचित्र ‘खिलाडी’को हिन्दी डबलाई नेपालमा रिलिज गर्न लागिएको हो । यसअघि ‘पुष्पा’ नामक साउथ चलचित्र नेपाल भित्र्याएका वितरक मनोज राठी र उनको टिमले ‘खिलाडी’ प्रदर्शनको अधिकार लिएको छ ।
मनोजले संचारमाध्यमलाई भने, ‘हामीले साउथ चलचित्र ल्याउने विषयमा ‘चपली हाइट ३’का निर्मातासँग पनि कुराकानी गरेका थियौं । उहाँ पनि यो चलचित्र रिलिजमा सहमत हुनुहुन्छ । दर्शकलाई फेरि हलमा फर्काउनका लागि हरेक प्रकारका चलचित्र आवश्यक छ ।’ यो चलचित्रमा रवि तेजा, मिनाक्षी चौधरी, डिम्पल हायाथी लगायतका कलाकारको मुख्य भूमिका छ । चलचित्रमा रमेश बर्माको कथा, पटकथा तथा निर्देशन रहेको छ ।
