काठमाण्डौँ, 7 मे 2020
कोरोना भाइरस रोकथाम तथा नियन्त्रणका लागि सरकारले लागू गरेको लकडाउनको आज 45 औँ दिन पूरा भएको छ। सरकारले गत चैत 11 गतेदेखि लागू गरेको लकडाउनको 45 दिन अर्थात डेढ महिना पुगेको हो। लकडाउनका कारण जनजीवन प्रभावित भएपनि कोरोना भाइरस फैलन नदिन सरकारले लकडाउनलाई निरन्तरता दिदै आएको छ। बिहीबारसम्म लागू गरिएको लकडाउनलाई सरकारले बुधबार पुनः जेठ 5 गते सम्म लम्ब्याएको छ। लामो समयदेखिको लकडाउनका कारण जनजीवन प्रभावित भएपनि मानिसहरुले लकडाउनलाई पालना गरेका छन्। तर सडकमा केही अत्यावश्यक सेवा तथा कर्मचारीका सवारीसाधनहरु सञ्चालनमा आएका छन्।
प्रहरीले लकडाउन पालना गराउन सवारी साधनको चेकजाँचलाई कडाई गरेको छ। बिहीबार काठमाडौँ उपत्यकाका विभिन्न ठाउँमा पुग्दा प्रहरीले चेकजाँचलाई निरन्तरता दिएको पाइएको छ। प्रहरीले पास बिना सञ्चालनमा आएका सवारी साधनलाई नियन्त्रणमा लिइ कारबाही गरेको छ। सहरका भित्रि सडकमा भने केही तरकारी एवम् खाद्य पसलहरु खुलेका छन्। मानिसहरु आफ्नो घर नजिक रहेको पसलसम्म पुगेर दैनिक उपभोग गर्ने सामग्रीहरु किनमेल गरेको देख्न सकिन्छ।
