काठमाण्डौँ, 7 मे 2020
कोरोना परीक्षणका लागि बिहीबार संघीय संसदका सांसद र अन्य गरी 441 जनाको थ्रोट स्वाब संकलन गरिएको छ। 179 जना प्रतिनिधिसभा सदस्य, 33 राष्टिय सभा सदस्य र 229 जना कर्मचारी तथा मर्यादापालक गरी जम्मा 441 जनाको स्वाब संकलन गरिएको संसद सचिवालयले जनाएको छ। बाँकी सांसद, सुरक्षाकर्मी र कर्मचारीको स्वाब संकलन शुक्रबार बिहान 8 बजेदेखि 10 बजेसम्म संसद भवनमै संकलन गरिने सचिवालयले जनाएको छ।
सचिवालयका अधिकारीहरुका अनुसार आज संकलन गरिएका स्वाब परीक्षणको नतिजा शुक्रबार बिहानदेखि क्रमशः आउन सुरु हुनेछ। शुक्रबार अपरान्हदेखि संसदको बजेट अधिवेशन सुरु हुन लागेको हुँदा त्यसअघि सांसदहरुको कोरोना परीक्षण पीसीआर विधिबाट गरिएको हो।
संसद बैठक स्थलमा पनि सांसदहरु बीचको दुरी कायम गरिने गरी व्यवस्था मिलाइएको छ भने संसद प्रवेश गर्नेहरुले अनिवार्य रुपमा मास्क लगाउनुपर्ने र ज्वरो जाँच गर्नुपर्ने व्यवस्था गरिएको छ।
