काठमाण्डौ, 5 डिसेम्बर 2020
पार्टीभित्रको विवाद समाधान गर्नका लागि नेकपा सचिवालय बैठक आज बोलाइएको छ । मंसिर 17 मा बोलाइएको पछिल्लो बैठकमा प्रधानमन्त्री एंव नेकपा अध्यक्ष केपी शर्मा ओली आफै उपस्थित नभएपछि बैठक आजका लागि सारिएको थियो । आजको बैठकमा अध्यक्ष ओली उपस्थित भएर विवाद समाधान प्रक्रिया अगाडी बढ्ने कयौं नेताहरुले विश्वास लिएका छन । तर पार्टीका शीर्ष नेताहरू आ–आफ्नै अडानमा कायम रहेका कारण विवाद झन्झन् गम्भीर बन्दै गइरहेको छ ।
सत्तारूढ नेपाल कम्युनिस्ट पार्टी (नेकपा) भित्रको विवाद बढ्दै गइरहेको बेला दुवै समूहका नेता सहमति गर्न छोडेर आ–आफ्नै रणनीतिमा जुटेका छन् । विवाद समाधानका लागि नेताहरूको दौडधूप बढेको भए पनि सहमति जुट्न सकेको छैन । प्रधानमन्त्री एवम् पार्टी अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डले सचिवालय बैठकमा छुट्टाछुट्टै राजनीतिक प्रस्ताव पेस गर्दै एक अर्कालाई गम्भीर आरोप लगाएपछि विवादले उग्र रूप लिँदै आएको छ ।
