काठमाडौं, 8 जनवरी 2022
शिक्षा तथा समाजसेवी सीताराम ढकालको जीवनीमा आधारित कृति ‘ज्येष्ठ नागरिक योद्धा सिताराम ढकाल’को लोकार्पण गरिएको छ । उहाँको परिवारद्धारा स्थापित सीताराम–पदमकुमारी फाउन्डेसनको आयोजनमा शनिबार काठमाडौंमा समारोहका बीच नेपाल प्रज्ञा प्रतिष्ठानका कुलपति गङ्गाप्रसाद उप्रेतीले उक्त पुस्तक लोकार्पण गर्नुभएको हो । कार्यक्रममा उप्रेतीले ज्येष्ठ नागरिकका लागि भत्ताको व्यवस्था गरेपनि सामाजिक सुरक्षाका लागि राम्रोसंग व्यवस्थापन पनि गर्नुपर्ने बताउनुभयो । उहाले सामाजिक रुपान्तरणका लागि समाजसेवी सीताराम ढकालले खेल्नुभएको भूमिकाको चर्चा पनि गर्नुभएको थियो । गत वर्ष पुस ५ गते निधन हुनुभएका ढकाल भोजपुर र काठमाडौँमा आफ्नो जीवनभर सामाजिक सेवामा सक्रिय हुनुभएको थियो । विसं २०५६ मा काठमाडौँ आएपछि उहाँले विशेष गरी ज्येष्ठ नागरिकको हकहितमा योगदान गर्नुभएको छोरा (प्रहरी वरिष्ठ उपरीक्षक) भीमप्रसाद ढकालले बताउनुभयो । ढकालको योगदानका बारेमा साहित्यकार विप्लव ढकाल, पुस्तकका प्रधानसम्पादक कुलप्रसाद पराजुली, फाउण्डेसनका अध्यक्ष विश्वमणि गौतमलगायतले चर्चा गर्नुभएको थियो ।
