नयाँ दिल्ली, 13 डिसेम्बर 2020
नेपाली काँग्रेसका केन्द्रिय सदस्य डा. शेखर कोइरालाले सरकारले अति गरेपछि कोभिड-19 महामारीका बिच सडक प्रदर्शनमा उत्रन लागेको बताउनु भएको छ । कोभिड-19 बाट संक्रमित दाजुको उपचारका लागि दिल्ली पुग्नु भएका नेता कोइरालाले नेजस उत्तर भारत क्षेत्रकी अध्यक्ष सुनिता जीसी कुँवरका पिता गणेश बहादुर जीसीको निधनमा राखिएको शोकसभा कार्यक्रममा नेशनल लाईभसित कुरा गर्दै भ्रष्टाचारमा लिप्त, जनताप्रति उत्तरदायी नहुनु र सुशासन समेत नभएको सरकारले हुँदाहुँदै विपक्षी दलका नेतामाथि गरेको दमनपछि सडकमा आउन बाध्य भएको बताउनुभयो । केहीदिन अघि वरिष्ठ नेता रामचन्द्र पौडेलमाथि गरेको दमनपछि सरकारको रबैया अति भएको लागेर कोभिड महामारीकै क्रममा विरोध कार्यक्रम राखेको समेत उहाँले बताउनुभयो । नेपाली काँग्रेस पहिला के भएको थियो भन्ने कुरा बिर्सेर अब एक ढिक्का भएर सरकारको विरोधमा अगाडी बढ्ने समेत बताउनुभयो ।
उहाँले नेपाली काँग्रेसले सोमबार सरकारको विरोधमा देशव्यापी र नेपाली काँग्रेसको भातृ संगठन नेपाली जनसम्पर्क समितिहरुले विदेशमा खबरदारी लगायतका विरोधका कार्यक्रम गर्ने समेत बताउनु भयो । नेपाली जनसम्पर्क समिति भारतले भने सोमबार दिल्लीस्थि नेपाली राजदूतावास अगाडी प्रदर्शन गर्ने तयारी गरेको छ।
शोकसभामा नेता शेखर कोइरालासहित युवा नेता सन्दीप राना, नेजस भारतका सदस्यहरुले नेजस उत्तर भारत क्षेत्रकी अध्यक्ष सुनिता जीसी कुँवरका पिता गणेश बहादुर जीसीप्रति श्रद्धाञ्जली अर्पण गरेका थिए भने कार्यक्रममा 2 मिनेटको मौन धारण समेत गरिएको थियो ।
