काठमाण्डौँ, 24 अप्रेल
नेपाली काँग्रेसको भातृ संगठन नेपाल विद्यार्थी संघले सरकारले जारी गरेका अध्यादेशहरु फिर्ता गर्नुपर्ने माग गर्दै देशभरी प्रदर्शन गरेको छ। सरकारले सोमबार जारी गरेका अध्यादेशहरु फिर्ताको माग गर्दै नेविसंघले प्रदर्शन गरेको हो। लकडाउनको पालना गर्दै सामाजिक दुरी कायम गरेर 77 वटै जिल्लामा विरोध प्रदर्शन गरिएको नेविसंघले जनाएको छ।
सरकारले जारी गरेका अध्यादेश विरुद्ध लकडाउनको पालना गर्दै सामाजिक दुरी कायम गरी सांकेतिक विरोध प्रदर्शन गरिएको नेविसंघ महामन्त्री युवराज पाण्डले बताउनुभयो। सिंगो देश कोरोना भाइरस (कोभिड-19) विरुद्ध लडिरहेका बेला सरकारले आफ्नो स्वास्र्थपूर्तिका लागि राजनीतिक खेल खेलिरहेको आरोप उहाँले लगाउनुभयो। राजनीतिको फोहोरी खेल खेल्न सरकारले असंवैधानिक र अराजनीतिक तरिकाबाट दुईवटा अध्यादेश ल्याएको उहाँको आरोप छ। सरकारले दुवै अध्यादेश फिर्ता नगर्दासम्म आन्दोलन जारी रहने उहाँले बताउनुभयो।
जनताको अधिकार हनन गरी अधिनायकवाद लाद्न खोजे आन्दोलनमा उत्रिने चेतावनी पनि नेवि संघले दिएको छ। अफ्ठ्यारोमा सरकारलाई सहयोग गरिरहेको स्मरण गर्दै महामन्त्री पाण्डेले सरकारका गलत काम, भ्रष्टाचार, अनियमितता लगायतका विषयमा सधै खवरदारी जारी रहने बताउनुभयो। उहाँले राष्ट्रपति विद्यादेवी भण्डारीलाई देशको अभिभावक भएर आफ्नो जिम्मेवारी निर्वाह गर्न पनि आग्रह गर्नुभएको छ। ‘अध्यादेश खारेज गर, विधिको शासन लागु गर, विधिको तन्त्र जिन्दावाद, लोकतन्त्र जिन्दावाद’ जस्ता नारा लगाउँदै नेविसंघले विरोध प्रदर्शन गरेको हो।
यद्यपि सोमबार बसेको मन्त्रिपरिषदको बैठकको निर्णयानुसार जारी भएका अध्यादेशहरु खारेज भएका छन्। सरकारको रिफारिसमा राष्ट्रपति विद्यादेवी भण्डारीले शुक्रबार संवैधानिक परिषद् र राजनीतिक दलसम्बन्धी अध्यादेश खारेज गर्नुभएको हो।
