बैतडी, 11 मे 2020/ हिम शाह
नेपालकाे चिकित्सा क्षेत्र सुधारका लागि पटक-पटक अनसन बसिसक्नु भएका डाक्टर गोविन्द केसी सोमबार बेलुका बैतडी पुग्नुभएको छ। समग्र सुदूरपश्चिमको स्वास्थ्य अवस्था बुझ्न आउनुभएका उहाँ आज साँझ बैतडीमा पनि पुग्नुभएको हो। 2 दिनसम्म बैतडीमा रहँदा उहाँले समग्र जिल्लाको स्वास्थ्य अवस्थाको बारेमा बुझ्नु हुने जिल्ला अस्पताल बैतडीका प्रमुख डाक्टर बशन्तराज जोशीले जानकारी दिनुभयो।
यसका साथै उहाँले उपचारका लागि आउने बिरामीको नि:शुल्क उपचार गर्नुहुने जनाईएको छ। 2 दिन बैतडीमा बसेपछी दार्चुला जाने उहाँको कार्यक्रम रहेको हाम्रा संवाददाता हिम शाहले बताउनुभयो।
यसअघि डाक्टर केसी बैशाख 25 गतेदेखि बझाङ जिल्ला अस्पतालमा रहनुभएको थियो। त्यसअघि उहाँ फागुन 20 गतेदेखि बैशाख 25 गतेसम्म डडेल्धुरा अस्पतालमा रहनुभएको थियो। बझाङ र डडेल्धुरामा रहँदा उहाँले बिरामीको उपचार गर्नुभएको थियो।
डाक्टर केसी चिकित्सा क्षेत्र सुधार र काठमाडौँ बाहिर सुदूरपश्चिमलगायत क्षेत्रमा मेडिकल कलेज खोल्नुपर्ने माग गरी पटक-पटक सरकारविरूद्ध अनसन बसेर चर्चामा आउनुभएको छ।
