हिमाचल, 23 नोभेम्बर 2020
हिमाचल राज्यको कुल्लू जिल्ला अन्तर्गत भुन्तरमा एक 60 वर्षीय नेपालीको शव फेला परेको छ । उनको शव भुन्तरस्थित बसपार्कमा हिजो आइतवार विहान साढे 8 बजे बेवारिसे अवस्थामा फेला परेको हो । उनको सनाखत हुन नसक्दा पोस्टमार्टम पनि हुन सकेको छैन भने शव कुल्लुको शव गृहमा राखिएको मुल प्रवाह अखिल भारत नेपाली एकता समाज भुन्तर नगर समितीका अध्यक्ष कन्हैया लाल चौधरीले बताउनु भएको छ ।
यद्धपी उनको पहिचान हुन सकेको छैन । तर बस पार्क नजिकै ढाबा संचालक सोनमका अनुसार उनले आफ्नो नाम लाल सिंह बताउथे । अन्दाजी 60 वर्ष उमेरका उनले कहिले आफ्नो घर नेपालगंज त कहिले सुर्खेत घर बताउने गरेका थिए । 12 वर्षअघि श्रीमतीको मृत्यु भएपछि घरमा छोरा छोरी कसैले न हेरेका कारण उनले आफ्नो ज्यान पाल्न भारत आएको आफुलाई बताएको ढाबा संचालक सोनमले बताउनु भयो।
मुल प्रवाहका अनुसार उनको साथबाट कुनै प्रकारको डकुमेन्ट फेला नपारिएकाले उनको पहिचान गर्न गार्हो भएको छ । तर उनको साथबाट पिथौरागढ र पत्लीकुलमा स्वास्थ्य जाँच गराएको मेडिकल रिपोर्ट फेला परेको छ । तस्वीरमा देखिएका मृतक वृद्धलाई चिन्नु भएको छ भने मूल प्रवाहलाई खबर गर्न मुल प्रवाह अखिल भारत नेपाली एकता समाज भुन्तर नगर समितीले आग्रह गरेको छ ।
