नयाँ दिल्ली, 9 अप्रेल
नेपाली जनसम्पर्क समिति भारतले कोरोना महामारी रोकथामका लागि गरिएको लकडाउनले भारतमा अलपत्र परेका नेपालीहरुलाई खाद्यान्न लगायतका राहत सामग्री सहयोग गर्ने क्रममा आज हरियाणाको कापसहेडामा रहेका ३० जना नेपाली मदजूरहरुलाई खाद्यान्न वितरण गरेको छ । भारतमा रहेका विभिन्न प्रवासी राजनैतिक संगठनहरुले दलगत स्वार्थभन्दा माथि उठेर समस्यामा परेका नेपालीहरुलाई सहयोग गर्ने प्रतिवद्धता यसअघिनै जनाईसकेका छन । विभिन्न संगठनले सहयोग गरिरहेका क्रममा आज नेपाली जनसम्पर्क समिति भारतका अध्यक्ष एंव नेपाली काँग्रेसका केन्द्रीय आमन्त्रीत सदस्य बालकृष्ण पाण्डेको नेतृत्वमा कापसहेडामा 30 जना नेपालीहरुको भोको पेट भर्ने प्रयास गरिएको हो । पाण्डेको साथमा सहयोगी ओमप्रकास शर्मा पनि रहनुभएको थियो ।
नेशनल लाईवसँग कुरा गर्दै पाण्डेले भारतमा समस्यामा परेका नेपालीहरुको अवस्था दयनीय हुँदै गएकाले आफुले प्रतिपक्षी दलको हैसियतले नेपाल सरकारलाई दवाब दिन नेपाली काँग्रेसका सभापति शेर बहादुर देउवालाई आग्रह गरेको बताउनु भयो । सम्वादका क्रममा भारतमा नेपालीहरुको अवस्थाको बारेमा कुराकानी भएको बताउनुभयो । भारतमा नेपालीहरुमाथि परेको समस्या व्यक्तिगत प्रयासले सम्भव नभएकाले नेपाल सरकारले त्यसको जिम्मा लिएर समाधान गर्नुपर्ने धारणा देउबाले राख्नुभएको पाण्डेले बताउनुभयो ।
भारतमा रहेका नेपालीहरुको समस्या समाधानका लागि देउबाले सरकारलाई पटक-पटक घचघच्याईरहेको पाण्डेको भनाई थियो । उहाँले नेपाल सरकारले पहल नगरेसम्म आफुरहेको स्थानमा रहन नेपालीहरुलाई आग्रह गर्दै समस्यामा परेका नेपालीहरुलाई सहयोग गर्न नेजस भारत मातहतका समितिलाई निर्देशन दिनुभयो ।
