बैतडी, 8 जुलाई 2020, हिम शाह
भारतसंग सीमा जोडिएको बैतडीको झुलाघाट नाका आजदेखि ३ दिनका लागि खुलेको छ । दुवै देशका स्थानीय प्रशासनको समन्वयमा आजदेखि तीन दिनका लागि सीमा नाका खुला गर्ने सहमति भएको बैतडीका सहायक प्रमुख जिल्ला अधिकारी लोकेन्द्रसिंह नेगीले जानकारी दिनुभयो ।
कोरोना भाईरसको जोखिमका कारण अन्तराष्ट्रिय सीमा नाका बन्द भएकाले दुवै देशका स्थानीय प्रशासनहरुको सहमति नाका खोलिएकोो हो ।
सीमामा फसेका नागरिकलाई स्वदेश फर्काउने, भारतबाट पेन्सन बुझ्ने नागरिकलाई पेन्सन बुझ्नका लागि र नेपालबाट भारत फर्कन चाहने भारतीय नागरिकका लागि सीमा नाका खुुला भएको हो । आज बिहान ९ बजेदेखि नाका खुला भएको जिल्ला प्रशासन कार्यालय बैतडीले जनाएको छ ।
पेन्सन बुझ्ने नागरिकलाई दैनिक एक सय जनालाई मात्रै नाकाबाट भारत पस्न दिइने छ । त्यसका लागि जेष्ठताको आधारमा सोल्जर बोर्डले कुपनको व्यवस्था गरेको छ ।
यस्तै नाकाबाट फर्कने नागरिकलाई सामान्य चेकजाँच गरेर स्वदेश फर्काइनेछ । सीमा नाकामा २ सय जति नागरिक रहेको अनुमान गरिएको छ ।
सरकारले झुलाघाट नाकालाई स्वदेश भित्रिनका लागि आधिकारिक नाका तोकेको भएपनि भारतले सहमत नहुँदा गत महिनादेखि खुल्न सकेको थिएन् । लामो प्रयासपछि मात्र झुलाघाट नाका खोल्न भारत सहमत भएको बैतडीका प्रमुख जिल्ला अधिकारी मोहनराज जोशीले बताउनुभयो ।
३ महिनादेखि सीमा नाका बन्दा हुँदा भारतीय पेन्सनधारी नेपाली नागरिकलाई समस्या भएको थियो । भारतीय सेनाबाट सेवा निवृत भएका, अन्य भारतीय सरकारी कार्यालयबाट निवृत भएका नेपाली नागरिकलाई पेन्सनको रकम प्राप्त गर्न समस्या भएको थियो । भारतीय पेन्सनधारीको पेन्सनवाफतको पैसा भारतीय बैंकमै आउने गर्दछन् ।
जारी लकडाउनका कारण सीमा नाका बन्द भएपछि गएको तीन महिना यता पेन्सन नपाएको हुन् ।
बैतडीबाट मात्रै करीब २ हजार बढी नागरिकले भारतको झुलाघाटबाट पेन्सन बुझ्ने गरेका छन् ।
