काठमाण्डौँ, 7 अप्रेल
नेपाल राष्ट्र बैंकका नवनियुक्त गभर्नर महाप्रसाद अधिकारीले कोभिड–19 का कारण राष्ट्र बैंकमाथि चुनौति थपिएको बताउनुभएको छ। मंगलबार पदभार ग्रहण गरेपछि पत्रकारहरुसँग कुरा गर्दै नवनियुक्त गभर्नर अधिकारीले कोभिड-19 को असर अर्थतन्त्रमा पर्ने र त्यसको प्रत्यक्ष चुनौती राष्ट्र बैंकमाथि हुने बताउनुभएको छ। उहाँले वित्तीय क्षेत्रलाई खराब अवस्थमा जान नदिन र नागरिकको विश्वासलाई जोगाउन धेरै खालका वित्तीय उपकरणहरु प्रयोग गरिने समेत बताउनुभयो।
प्रधान न्यायाधिस चोलेन्द्र शम्शेर जवरासमक्ष मंगलबार बिहान सपथ ग्रहण गरेपछि गभर्नर अधिकारी बालुवाटारस्थित केन्द्रीय बैंकको कार्यालय पुगेर पदभार ग्रहण गर्नुभएको हो। मन्त्रिपरिषद्को सोमबारको बैठकले अधिकारीलाई नेपाल राष्ट्र बैंकको 17 औँ गभर्नरको रुपमा नियुक्त गरेको थियो।
