काठमाण्डौँ, 9 अप्रेल
नेपाल भारत मानव विकास एवम् मैत्री संघले सूदुरपश्चिम प्रदेशमा कोरोना विरुद्धको स्वास्थ्य उपचारमा रहेका चिकित्सकका लागि अत्यावस्यक स्वास्थ्य सामग्री उपलब्ध गराएको छ। संघले बिहीबार कोरोना भाइरस विरुद्धको स्वास्थ्य उपचारमा संलग्न चिकित्सकका लागि 200 थान पी.पी.ई. सहित आवश्यक स्वास्थ्य सामग्री सरकारलाई उपलब्ध गराएको छ। सूदुरपश्चिम प्रदेशको समन्वयको जिम्मेवारी पाउनु भएकी खानेपानी मन्त्री बिना मगरलाई सहरी राज्य मन्त्री रामवीर मानन्धर सहित नेपाल भारत मानव विकास एवं मैत्री संघका पदाधिकारीहरुले उक्त सामग्रीहरु हस्तान्तरण गर्नुभएको छ। स्वास्थ्य सामग्री ग्रहण गर्दै खानेपानी मन्त्री मगरले सूदुरपश्चिममा देखिएको अवस्थालाई मध्यनजर गरेर आवश्यक समन्वय भइरहेको र उपलब्ध भएका सामग्रीहरु छिट्टै प्रदेश सरकारलाई हस्तान्तरण गरिने बताउनुभयो।
सहरी विकास राज्य मन्त्री मानन्धरले विपद्को समयमा सरकार जनताको साथमा रहेको बताउँदै सबैलाई सहयोग गर्न आव्हान गर्नुभयो। संघका अध्यक्ष सूर्यप्रसाद भुषालले नेपालमा निर्मित पीपीइ कोरोना उपचारमा उपयुक्त रहेकोले आफुहरुले सहयोग गरेको बताउनुभयो। उहाँले सहयोग गरिएका सामग्रीहरुमा मास्क, सुकभर, क्याप्स, गगल्स, फेससिल, स्यानिटाइजर, पञ्जा, एप्रोन लगायत रहेको बताउनुभयो।
