काठमाण्डौँ, 29 अप्रेल
कोरोना भाइरस महामारीको उपचारमा संलग्न चिकित्सकहरुका लागि सनराईज बैंकले विभिन्न अस्पतालहरुमा पीपीई उपलब्ध गराएको छ। पहिलो पङ्क्तिमा रहेर कोरोना नियन्त्रणका लागि उपचारमा संलग्न हुनुपर्ने चिकित्सकको सुरक्षाका लागि बुधबार बनेपा र ठिमी अस्पताललाई बैंकले पीपीई उपलब्ध गराएको हो। बैंकका प्रमुख कार्यकारी अधिकृत जनक शर्मा पौडेलले दुवै अस्पताललाई 12/12 थान पीपीई उपलब्ध गराइएको बताउनुभयो। सामाजिक उत्तरदायित्व अन्तर्गत बैंकले आफ्नो प्रमुख जिम्मेवारी ठानेर पीपीई उपलब्ध गराईरहेको उहाँले बताउनुभयो।
पीपीई बुझेपछि श्री मेमोरियल अस्पताल काभ्रेका डा. शिवजी विक्रम सिलवालले अहिलेको समयमा पहिलो पङ्क्तिमा बसेर उपचारमा खटिने चिकित्सकहरुका लागि पीपीई महत्वपूर्ण भएको बताउनुभयो। अस्पतालको कार्डियोलोजी विभागका निर्देशकसमेत रहनुभएका डा. सिलवालले चिकित्सक सुरक्षित नभएसम्म कोरोनाको उपचार पनि सुरक्षित नहुने भएकाले पीपीई बिना उपचार सम्भव नभएको बताउनुभयो। महामारीको समयमा बैंकले पीपीई उपलब्ध गराएकोमा उहाँले बैंकलाई धन्यवाद समेत दिनुभयो।
कोरोनासँग डराएर नभइ डटेर लड्नुपर्ने अहिलेको समयमा सम्पूर्ण सुरक्षाका विधि अपनाएर सरकारी नीति पालना गर्न बैंकले सबैलाई आग्रह गरेको छ। अहिलेको समयमा बैंकिङ कारोबारलाई डिजिटल माध्यमलाई बढी प्राथमिकता दिन बैंकले आग्रह गरेको छ।
