नेपालगन्ज, 1 मे/ हिम शाह
नेपालगन्जका एक जना पुरुषमा कोरोना संक्रमण पुष्टि भएपछि शहरका 4 स्थानलाई सिल गरिएको छ। कोरोना पोजेटिभ देखिएका व्यक्ति नेपालगन्ज उपमहानगरपालिकाको डीएसपी रोड महेन्द्र पार्कका 60 वर्षीय पुरूष हुन्। भारतको सीमा क्षेत्र बहराइचबाट करिब एक महिनाअघि नेपाल फर्किएका उनलाई क्वारेन्टिनमा राखिएको थियो। महेन्द्र बहुमुखी क्याम्पसको क्वारेन्टिनबाट झन्डै 6 सय जना भागेका थिए। यी संक्रमित पनि भाग्नेमध्ये भएको प्रहरी स्रोतले बताएको छ।
नेपालगञ्जका डीएसपी रोड, वडा न 8 महेन्द्र पार्क, धम्बोजी चोक र एकलैनी क्षेत्र सिल गरिएको बाँकेका प्रमुख जिल्ला अधिकारी कुमार बहादुर खडकाले बताउनुभयो। प्रशासनका अनुसार संक्रमित व्यक्ति डीएसपी रोडस्थित घरबाट महेन्द्र पार्कस्थित मस्जिदमा दैनिक आउजाउ गर्दै आएका थिए। जसका कारण उनि थुप्रै व्यक्तिहरुको सम्पर्कमा पुगेको हुनसक्ने भन्दै सिल गरिएको हो। उनकी श्रीमती र छोरा तथा नजिकका छिमेकीहरुको पनि कोरोना जाँच गरिने भएको छ।
नेपालगञ्ज धम्वोजीका अर्का एक युवामा पनि संक्रमणको आशंका गरिएपछि यो क्षेत्र सिल गरिएको हो। ती युवा धम्बोजीस्थित मस्जिदमा बस्दै आएका थिए। डुडवा गाउँपालिकाकाका ती युवा लामो समयदेखि उनि घर छोडर मस्जिद बस्दै आएका छन्। उनलाई पनि खजुरास्थित क्यान्सर अस्पतालमा रहेको आइसोलसनमा राखिएको छ। उक्त मस्जिद लकडाउनपछि बन्द गरिएको थियो। उनको पनि बिहीबार स्बाव संकलन गरी जाँच गरिएको छ।
