नयाँ दिल्ली, 11 मई 2020
नेपाली जन सम्पर्क समिति उत्तर भारत क्षेत्रले भारतमा अलपत्र नेपालीहरूलाई नेपाल फर्काउन माग गर्दै प्रदेश नम्बर 5 का मुख्यमन्त्री शंकर पोखरेललाई ज्ञापन पत्र बुझाएको छ। नेजस उत्तर भारत क्षेत्रकी अध्यक्ष सुनिता जीसी कुँवरको नेतृत्वमा गएको टोलीले आज प्रदेश नम्बर 5 का मुख्यमन्त्री पोखरेललाई भेटेर भारतमा बिचल्लीमा परेका नेपालीहरूको तत्काल समस्या समाधानका लागि पहल गर्न आग्रह गरेको हो।
कोरोना महामारीका कारण गरिएको लकडाउनले भारतमा समस्यामा परेका नेपालीहरू हिडेरै सीमासम्म आएको भन्दै उनिहरूलाई सीमा क्षेत्रमा खाना र बस्न समस्या भएको उल्लेख गर्दै तत्काल नेपाल फिर्ता गर्न नसकिने भए, सोही स्थानमा गासबास तथा स्वास्थ्य परीक्षणको व्यवस्थापन गर्न अपील गरेको छ। भारतमा रहेका तीर्थ यात्रीहरू, विद्यार्थीहरू र मजदुरहरू लामो समयदेखि अलपत्र परेको अवस्थामा भारतस्थित नेपाली दूतावासको उपस्थिति पनि फितलो रहेको विज्ञप्तिमा भनिएको छ। नेपाल सरकारले नेपालीहरूको जीवन रक्षाका लागि भारत सरकारसँग समन्वय गरिएको भनिएपनि त्यसको पालना नभएको विज्ञप्तिमा उल्लेख छ।
भारतमा रहेका नेपालीहरू नेपाल सरकारको मापदण्ड अनुसार क्वारेन्टिनमा बसेर स्वास्थ्य परीक्षण गराएपछि घर फर्कन तयार रहेको हुँदा उनिहरूलाई स्वदेश फर्कनबाट बन्चित नगर्न पनि नेजस उत्तर भारत क्षेत्रले आग्रह गरेको छ।
यसअघि नेजस उत्तर भारत क्षेत्रले भारतमा अलपत्र नेपालीहरूलाई स्वदेश फर्काउन माग गर्दै सूदुरपश्चिम प्रदेशका मुख्यमन्त्री त्रिलोचन भट्टलाई ज्ञापन बुझाएको थियो।
