काठमाण्डौँ, 17 मई 2020
राष्ट्रिय मुस्लिम आयोगले ट्राफिक प्रहरीलाई विभिन्न स्वास्थ्य सामग्री हस्तान्तरण गरेको छ। आयोगका अध्यक्ष समिम मिया अन्सारीले महानगरिय ट्राफिक प्रहरी महाशाखा पुगेर स्वास्थ्य सामग्री हस्तान्तरण गर्नुभयो। अध्यक्ष अन्सारीले महानगरिय ट्राफिक प्रहरी महाशाखा प्रमुख भीम प्रसाद ढकाललाई स्वाथ्य सामग्री हस्तान्तरण गर्नुभएको हो। आयोगले 20 हजार थान मास्क, 20 लिटर सेनिटाइजर र साबुन लगायतका अन्य सामग्री हस्तान्तरण गरेको हो। सहयोग सानो भएपनि नागरिकको सुरक्षाका लागि खटिने सुरक्षाकर्मीहरुको हौसला बढाउन स्वास्थ्य सामग्री उपलब्ध गराइएको उहाँले बताउनुभयो।
स्वास्थ्य सामग्री ग्रहणपछि महाशाखा प्रमुख ढकालले विश्वमहामारीको रुपमा फैलिएको कारोनाले नेपालमा पनि आतंक भइरहेको अवस्थामा सुरक्षाकर्मीहरुको जिम्मेवारी बढ्दै गएको बताउनुभयो। दिनभरी सडकमा खटिने ट्राफिक प्रहरी धरै मानिसहरुसँग सम्पर्कमा हुने भएकाले जोखिम रहेको उल्लेख गर्दै उहाँले स्वास्थ्य सामग्रीहरुको आवश्यकता बढी हुने गरेको बताउनुभयो।
नेपालमा कोरोना संक्रमणको जोखिम बढ्दै गएको छ। आइतबार दिउँसो 1 बजेटको तथ्याङ्क अनुसार नेपालमा 291 जनामा संक्रमण देखिएको छ भने 1 जनाको मृत्यु भएको छ।
