काठमाण्डौँ, 20 मई 2020
कोरोना भाइरस (कोभिड–19) नियन्त्रण तथा रोकथामका लागि सरकारले जारी गरेको लकडाउनको आज 58 दिन पुगेको छ। गत चैत 11 गतेदेखि जारी गरिएको लकडाउनको आज 58 दिन पुगेको छ। कोरोना भाइरसको संक्रमण बढ्दै जाँदा सरकारले लकडाउनलाई थप कडाई पार्दै गएको छ। बुधबार काठमाडौं उपत्यकाका विभिन्न ठाउँमा पुग्दा लकडाउनलाई पालना गरिएको पाइएको छ। मुख्य सडकमा सवारी साधनको आवागमन न्यून देखिन्छ। सुरक्षाकर्मीले सवारी चेकजाँचलाई कडाई पारेका छन्। प्रशासनले जारी गरेको पास बिना सवारी चलाउनेलाई प्रहरीले नियन्त्रणमा लिई कारबाही गरेको छ। अत्यावश्यक सेवा, ढुवानी सेवाका साधनहरु भने सञ्चालनमा आएका छन्। यस्तै स्वास्थ्यकर्मी, सरकारी कर्मचारी, सञ्चारकर्मी लगायतका व्यक्तिका सवारी साधनलाई पनि सञ्चालन गर्न दिइएको छ।
उपत्यकाका भित्रि सडक छेउमा रहेका अत्यावश्यक उपभोग्य वस्तुका केही पसलहरु खुलेका देखिन्छन्। मानिसहरु आफ्नो घर नजिकको पसलसम्म पुगेर उपभोग्य वस्तुहरु किनमेल गर्ने गरेका छन्। लामो समय देखि लकडाउन हुँदा जनजीवन भने प्रभावित भएको छ।
