नयाँ दिल्ली, 23 नोभेम्बर 2020
पछिल्लो समय सीमा विवादका कारण नेपाल भारतको सम्बन्धमा तनाव आएको भएपनि अब सामान्यीकरण तर्फ उन्मुख भइरहेको छ । निरन्तर रुपमा भइरहेको भारतीय उच्चाधिकारीहरुको नेपाल भ्रमणले सम्बन्ध सामान्य भइरहेको देखाइरहेको छ । केही दिन अघि भारतीय थल सेना प्रमुख जनरल मनोज मुकुन्द नरवणेको नेपाल भ्रमणपछि फेरि भारतीय विदेश सचिव हर्षवर्धन श्रृङ्गला नेपाल भ्रमणमा जाँदै हुनुहुन्छ । परराष्ट्रमन्त्रालयले आज भारतीय विदेश सचिव हर्षवर्धन श्रृङ्गलाको नेपाल भ्रमणको औपचारिक घोषणा गरेको हो । परराष्ट्रमन्त्रालयका अनुसार भारतीय विदेश सचिव श्रृङ्गला परराष्ट्र सचिव भरतराज पौड्यालको निमन्त्रणामा 26 र 27 नोभेम्बरमा 2 दिन नेपालको भ्रमणमा रहनुहुनेछ । मन्त्रालयले भ्रमण 2 मित्र राष्ट्रको नियमित भेटघाटको निरन्तरता भएको जनाएको छ । भ्रमणको पहिलो दिन दुवै देशका विदेश सचिवबिच द्विपक्षीय बैठक हुनेछ । बैठकमा नेपाल-भारतबिच सहयोगका वृहत क्षेत्रहरुबारे छलफल हुनेछ । सोही दिन भारतीय विदेश सचिव श्रृङ्गलाले नेपालका उच्चाधिकारीहरुलित भेटघाट गर्नुहुनेछ । भ्रमणका क्रममा उहाँले कोभिड-19 सम्बन्धि सहयोग नेपाल सरकारलाई हस्तान्तरण गर्नुहुनेछ । भारतीय विदेश सचिव श्रृङ्गला आफ्नो 2 दिने भ्रमण पुरा गरि 27 नोभेम्बरका दिन नयाँ दिल्ली फिर्ता हुनुहुनेछ ।
