हिमाचल प्रदेश, 4 डिसेम्बर 2020
रोजगारीका लागि भारत पस्ने कयौं नेपालीहरु विविध कारणले गर्दा भारतमै सम्पर्कविहीन हुन पुग्छन । त्यसमध्ये कयौं भेटाइन्छन भने कयौं नेपालीहरु वर्षौसम्म पनि परिवारबाट टाढै रहन्छन । तर आज हामी यस्तो घटना लिएर आएका छौ, जो कमाउनका लागि भारत त आए तर सोझोपनले पैसा कमाउन नसकेपछि 45 वर्षसम्म घरनै फर्कन पाएनन । तर यतिका वर्षपछि अहिले उनि नेपाली समाजसेवीको सम्पर्कमा आउँदा घर फर्किन पाएका छन ।
मकवानपुरको कालिकाटार कैलाश गाँउपालिका वडा नम्बर 10 का देवान सिंह नेगी 45 वर्षअघि पैसा कमाउन भारत आएका थिए । उनि लेह लद्धाकमा काम गर्दै ज्यान पालिरहेका थिए । युवा अवस्थामा काम गर्न आएका भएपनि उनि अहिले 70 वर्षको वृद्ध भइसकेका छन । उनले बताए अनुसार उनि काम गर्न आएका थिए । तर कतिपयले काममा मात्रै लगाउने पैसा नदिने गरेका कारण पैसानै जम्मा गर्न नसकेपछि घरनै जान नपाएको बताएका छन । कोभिड महामारीकै क्रममा उनलाई कसैले गाडीमा हिमाचल प्रदेशको मनाली पुऱ्याइदिएपछि त्यहा रहेका नेपालीहरुले सहयोग गरेर नेपाल पठाएका छन । उनिहरुले मकवानपुरको कैलाश गाँउपालिकामा सम्पर्क गरि उनको परिवारको खोजी गरि गड्डाचौकी नाकासम्म गाडीको व्यवस्था गरि पठाएका हुन । मूल प्रवाह अखिल भारत नेपाली एकता समाज कूल्लू मनालीले दिएको जानकारीका अनुसार उनको परिवारको खोजी गरेपछि नेपाली ड्राइभर वेलफेयर सोसाईटी मनालीले देवान सिंहलाई गड्डाचौकीसम्म पुऱ्याएको थियो । त्यहाबाट उनलाई उनका नातिहरुले घर लिएर गएका थिए ।
उनी यतिका वर्षपछि भेटाइएपछि परिवार मात्र होईन पुरै गाँउका वासिन्दाहरु खुशी भएका छन । यतिका वर्षसम्म आशै छोडिसकेकाले उनलाई यसरी भेटदा खुशी भएका हुन । उनको परिवारमा उनकी पत्नीसहित छोराछोरी र नातिनतिना पनि रहेको बुझिएको छ ।
