काठमाण्डौँ, 17 अप्रेल
प्रमुख प्रतिपक्षी दल नेपाली काँग्रेसका सभापति शेरबहादुर देउवाले लकडाउनका कारण अलपत्र परेका जनताको विषयमा चासो व्यक्त गर्नुभएको छ। कोरोना भाइरस (कोभिड–19) महामारी रोकथाम र नियन्त्रणका लागि सरकारले लकडाउन गरेपछि राजधानीबाट गाउँ-गाउँसम्म मजदुर हिँडेर गएका खबर सार्वजनिक भएपछि देउवाले यो विषयमा चासो राख्दै उनीहरुलाई सहयोग गर्न माग गर्नुभएको हो।
पूर्व-प्रधानमन्त्रीसमेत रहनुभएका सभापति देउवाले ट्वीटहरूको एक शृङखलामा जनतालाई सुरक्षित तरिकाले गाउँ पुऱ्याउन सरकारसँग माग गर्नुभएको छ। ‘राजधानीबाट घर जाने ती जनताहरूलाई तत्काल गासवासको प्रवन्ध गरी सुरक्षित ढङ्गले गाउँ पुऱ्याउने व्यवस्था मिलाउन म सरकारसँग आग्रह गर्दछु’, पहिलो ट्वीटमा देउवाले लेख्नुभएको छ।
दोस्रो ट्वीटमा देउवाले निमुखा नागरिकको पीडामा सरकार दर्शक बनेको भन्दै आपत्ति जनाउनुभएको छ। ‘काठमाण्डौँमा श्रम गरिरहेका नागरिकहरू खाना र बस्ने व्यवस्था नहुँदा सयौँ किलोमिटर पैदल हिँडेर घर गइरहेका छन्। सरकारको भरथेग सबैभन्दा बढी तिनै निमुखा जनतामाथि हुनुपर्ने हो, तर सरकारमा बसेकाहरु ति निमुखाहरूको त्यो यात्राको दर्शक मात्रै भएका छन्।’ देउवाले दोस्रो ट्वीटमा लेख्नुभएको छ।
तेस्रो ट्वीटमा भने देउवाले दुःख पाएका नागरिकलाई पार्टीका भातृ र शुभेच्छुक संस्थाका साथिलाई सामाजिक दूरी कायम गर्दै खाने र बस्ने व्यवस्था मिलाउन आग्रह गर्नुभएको छ। ‘लकडाउनको कारण काठमाण्डौँ लगायत विभिन्न क्षेत्रबाट खाना र बस्ने व्यवस्था नभएर पैदल हिँडेर घर गइरहेका नागरिकहरुलाई नेपाली काँग्रेसका स्थानीय तह र पार्टीको भातृ तथा शुभेच्छुक संस्थाका साथिले सामाजिक दुरी कायम गरी आ-आफ्नो क्षेत्रमा खाना र राति भए वासको प्रबन्ध मिलाउन आग्रह गर्दछु’, देउवाले तेस्रो ट्वीटमा लेख्नुभएको छ।
